გორის მერობის კანდიდატმა „ქართული ოცნებიდან“ ვლადიმერ ხინჩეგაშვილმა, წინასწარი მონაცემებით, პირველივე ტურში მოიგო, რაც საზოგადოების მხრიდან კრიტიკისა და ქილიკის საგანი გახდა.
აღნიშნულს “მთავარი არხის” გენერალური დირექტორი ნიკა გვარამია “ფეისბუქის” პირად გვერდზე ეხმაურება:
“ნუ გორის მერი როგორ გახდა, ან რატომ, იქეთ იყოს. როგორ ლაპარაკობს და კითხულობს, ასევე. ქოციც როა, ეგეც კი.
ლადო ხინჩეგაშვილზე ვერაფრით ვერ ვიფიქრებ ცუდად. ჯერ იმდენი ბედნიერება მაჩუქა თავისი ოლიმპიური ოქროთი და ვერცხლით, და ასევე იმდენად კეთილი და წესიერი ბიჭია (პოლიტიკაში მოსული აგრესიული ქოცზონდერსპირტსმენებისგან განსხვავებით), რომ ძალიან მიყვარს.
ეგეც რო გაზონდერ გაკორუმპირებულდის, ძაააააან გატეხავს.
P.S. კარგით რა, ხალხო, რა ლადო ხინჩაგაშვილის ლაპარაკი და კითხვა, სალომე ზურაბიშვილი გვყავს პრეზიდენტად,” – წერს გვარამია სოციალურ ქსელში.
ცენტრალური საარჩევნო კომისიის მონაცემებით, გორში “ქართული ოცნების” კანდიდატი, მოჭიდავე ვლადიმერ ხინჩეგაშვილი ლიდერობს.
შედეგები პირველ ორ ადგილზე გასულ კანდიდატებს შორის ასე გადანაწილდა:
ვლადიმერ ხინჩეგაშვილი – „ქართული ოცნება“ – 51,6%;
ვასილ მახარაშვილი – „ერთიანი ნაციონალური მოძრაობა“ – 32,42%.
გორის საარჩევნო ოლქში, 107 უბნიდან ხმები 63-შია დათვლილი.