ჟურნალისტი, ვიკა ბუკია “საზოგადოებრივი მაუწყებლის” ბორდის სამუშაო შეხვედრის კადრებს პირად გვერდზე აზიარებს და სამეურვეო საბჭოს თავმჯდომარეს, ვასილ მაღლაფერიძეს “ბოროტსა და უსამშობლოს” უწოდებს:
“აი, 100ჯერ ვუყურე ამ ვიდეოს. ვასილ მაღლაფერიძე ითხოვს პროკურატურისგან დაიჭირონ ადამიანები. საუბარია ზაუტაზე, ვასკაზე, გია იმნაიშვილზე და კახა მელიქიშვილზე.. ჩემო ძველო თანამშრომლებო, ამას ვერ ჩამოირეცხავთ, ვერასდროს. ეს ულვაშებიანი კაცი რა ბოროტი და უსამშობლო ყოფილა – კიდევ არ მცოდნია. პარტიას თუ დასჭირდა თქვენც ასე გაგწირავთ, მაგრამ აი, ამაში იღებთ მონაწილეობას ყველა ვინც ჩუმად ხართ, ვინც მხარს უჭერთ.”- წერს ვიკა ბუკია სოციალურ ქსელში.
შეგახსენებთ, რომ რამდენიმე დღის წინ, “პირველი არხის” სამეურვეო საბჭოს თავმჯდომარემ, ვასილ მაღლაფერიძემ არხის მიმართ კრიტიკულად განწყობილ თანამშრომლებს, ვასილ ივანოვ ჩიქოვანს, ნინო ზაუტაშვილს, კახა მელიქიძესა და გია იმნაიშვილს ცილისწამებაში დასდო ბრალი, ხოლო ბორდის წევრებს აღნიშნული ბრალდებების პროკურატურისთვის გამოსაძიებლად გადაცემა შესთავაზა.
ცნობისთვის, 5 თებერვალს, საზოგადოებრივი მაუწყებლის ჟურნალისტმა, ვასილ ივანოვ-ჩიქოვანმა სოციალურ ქსელში დაწერა, რომ მას 18:00-საათიანი მოამბე აღარ მიჰყავს – ჟურნალისტმა გაავრცელა პირველი არხის ოფიციალური პოზიცია, რომლის მიხედვითაც აღნიშნულის მიზეზად მოამბის პროდიუსერების მიერ ივანოვ-ჩიქოვანთან თანამშრომლობაზე უარის თქმას ასახელებდნენ.
საზოგადოებრივი მაუწყებლის პირდაპირი ეთერის რეჟისორმა, კახა მელიქიძემ, მაუწყებლის 3 თებერვალს გამართულ სამეურვეო საბჭოს სხდომაზე განაცხადა, რომ საფეხბურთო მატჩის ტრანსილაციისას მას “პრემიერის რაც შეიძლება მეტი კადრის ჩვენებას” სთხოვდნენ.