25 იანვარს თბილისში დატრიალებული უმძიმესი ტრაგედიის დეტალებს ახლა სამართალდამცავები იძიებენ. უნდა გაირკვეს, ვის დაუდევრობას შეეწირა 16 წლის მოზარდის, იოსებ ადეიშვილის სიცოცხლე.
როგორც ცნობილია, ბავშვი რიყის პარკის მიმდებარედ მდებარედ, რიყის დოქების ტერიტორიაზე წყლით სავსე თხრილში ჩავარდა და საუბედუროდ მისი გადარჩენა ვერავინ შეძლო. უმძიმესია ოჯახის მწუხარება. ბავშვის დედა ჟურნალისტთან ამბობს, რომ ამ ფაქტს მისი შვილის მეგობრები შეესწრნენ.
“ჩემი ბიჭი, ჩემი დიდი ფრთა იყო, ყველაფერი გავიარეთ, ქირიდან ქირამდე, სულ ქირით ცხოვრება, განიცდიდა ჩემი ოთახი არ მაქვსო. იქ შესულა, ტუალეტი უნდოდა და თხრილში ჩავარდა, ისე ყვიროდა, დამეხმარეთო, მიშველეთო, ბიჭებმა, მისმა მეგობრებმა გაიგეს იოსების ხმა, ვერაფერი ვერ უშველეს. წყალი 3 მეტრზე იყოო, ბავშვები ისე დაბნეულები არიან, ცუდად არიან. დაბნეულები არიან, მათ თვალწინ მათი ბავშვობის მეგობარი დაიღუპა. ბავშვებს ფსიქოლოგები სჭირდებათ. არ ვიცი საერთოდ რა ვთქვა, ძალა არ მაქვს, ისე მეცოდება ჩემი ბიჭი, არ ვიცი ეს ამბავი ვის დავაბრალო, გამგეობა, მერია, ვინ არის პასუხისმგებელი, ქალაქის მერს კახი კალაძეს მინდა ვუთხრა, მიაქციოს ამ საქმეს ყურადღება. იმერელი ბიჭია იოსებ ადეიშვილი და ყურადღება მიაქციოს ამ სიტუაციას. ვინმე რომ არ დაიღუპოს და ცუდი არაფერი არ მოხდეს. როგორც ბიჭები ამბობენ, რიყის დოქების დიდი მილები რომ არის იქ უკნიდან შევიდა და ელოდებოდნენ, ცოტა ხანში მისი ხმა გაიგეს. თვითონ 14- 15 წლისები არიან და არ იციან ექსპტრემალურ სიტუაციაში ერთმანეთს როგორ დაეხმარონ, წყალი რაც დაგროვებულია, ზედაპირულად როგორც ბეტონი ისე ჩანდა, ბავშვს ბეტონი ეგონა და ჩავარდა იქ… მყვინთავებმა ამოიყვანეს მერე იქიდან… კიდევ პატარა მყავს და შიშით ვარ ამ ქალაქში” – ამბობს ჟურნალისტებთან მომხდარით შეძრული მოზარდის დედა, ირმა ადეიშვილი.