“მშვიდად ვართ იმიტომ, რომ საქართველოს ჰყავს თეა წულუკიანისნაირი მაღალი დონის პოლიტიკოსი!” – ამის შესახებ მომღერალი და სამცხე-ჯავახეთის გუბერნატორის მოადგილე ზურა ხაჩიძე სოციალურ ქსელში წერს.
ზურა ხაჩიძე სტატუსს თან ურთავს თეა წულუკიანის განცხადებას, რომელიც არჩევნებს ეხებოდა.
“არ შეიძლება საუბარი იყოს გაყალბებაზე, როდესაც გამარჯვებულ პარტიასა და მეორე ადგილზე გასულ პარტიას შორის 800,000 ხმის სხვაობაა. ამგვარი გაყალბება ბუნებაში არ არსებობს! არ შეიძლება გაყალბებაზე საუბარი, როდესაც ხმები აღირიცხება ელექტრონული ტექნოლოგიით, რომელიც, სხვათა შორის, დასავლურმა კომპანიებმა დანერგეს საქართველოში. დასავლურმა კომპანიამ და არა რუსულმა, ჩაატარა აუდიტი და დაადასტურა, რომ ამ ტექნოლოგიის წყალობით გაყალბება შეუძლებელი იყო და თუ იყო რაიმე გადაცდომა, გამოძიება რვა სხვადასხვა შემთხვევაზე მიმდინარეობს. მაშინ რაში მდგომარეობს პრობლემა? პრობლემა ისაა, რომ არჩევნების შედეგი არ არის მოსაწონი!” – განაცხადა პარლამენტის ვიცე-სპიკერმა თეა წულუკიანმა PACE-ის კომიტეტზე სიტყვით გამოსვლისას.”