თბილისის მერმა, კახა კალაძემ, მედიასთან აშშ-ის ახალარჩეული პრეზიდენტის, დონალდ ტრამპის ინაუგურაციის შესახებ ისაუბრა.
მისი თქმით, ტრამპის ინაუგურაციის ბილეთის ღირებულება 500 000-დან 2 მილიონამდეა. ვისაც სურვილი აქვს, შეუძლია გადაიხადოს თანხა და დაესწროს.
„ბილეთები იყიდება ჩვეულებრივად და ნებისმიერ მსურველს შეუძლია, შეიძინოს. თუ არ ვცდები, ბილეთის ღირებულება იწყება 500 000-დან და ადის 2 მილიონ დოლარამდე. ამაში ოფიციალურ წყაროებშიც ღიად წერია. შესაბამისად, თუ აქვთ სურვილი, გადაიხადონ ეს თანხები, რატომაც არა, შეუძლიათ, ინაუგურაციას დაესწრონ…
ჩვენ ტრამპთან შეხვედრები და ურთიერთობები გვექნება მას შემდეგ, რაც ის თავის უფლებამოსილების განხორციელებას ოფიციალურად შეუდგება“, – აღნიშნა კალაძემ.
შეგახსენებთ, ტრამპის ინაუგურაციაზე, რომელიც 20 იანვარს უნდა გაიმართოს, „ქართული ოცნების“ ლიდერები წარმოდგენილი არ იქნებიან.