ორი წლის ანიტას, რომელსაც გულის მარცხენა წილების მკვეთრად გამოხატული დილატაცია აქვს, მდგომარება გაუმჯობესდა. საზოგადოების თანადგომით შეგროვდა საკმარისი თანხა, რომელიც მკურნალობის პირველ ეტაპზე სჭირდებოდა.
სოციალურ ქსელში ოჯახის ახლობლები ავრცელებენ პოსტს, სადაც პატარა ანიტას მდგომარეობაზე საუბრობენ. პოსტის ავტორის თქმით, მისი გულის მუშაობა გაუმჯობესებულია.
“ანიტას ჩაუტარდა საკონტროლო კვლევები, რომლის თანახმადაც მისი გულის მუშაობა გაუმჯობესებულია. ამასთანავე განდევნის ფრაქცია რჩება 14%-ზე.” – წერს ოჯახის ახლობელი სოციალურ ქსლეში.
“როგორც იცით, თქვენი საოცარი თანადგომის წყალობით, თანხა რომელიც ანიტას პირველი ეტაპისთვისაა საჭირო უკვე შეგროვდა, რისთვისაც კიდევ ერთხელ გიხდით მადლობას! თქვენ მოახდინეთ სასწაული!
ანიტას ჩაუტარდა საკონტროლო კვლევები, რომლის თანახმადაც მისი გულის მუშაობა გაუმჯობესებულია. ამასთანავე განდევნის ფრაქცია რჩება 14%-ზე.
ამ წუთებში მას უტარდება პრეპარატ სიმდაქსის მორიგი გადასხმა.
ანიტა ინარჩუნებს თამაშის, სიცელქის, მშობლების ჭკუიდან გადაყვანისა და ხაჭაპურზე გაგიჟების ხასიათს.
დღეს იტალიაში გავაგზავნეთ დამატებითი საბუთი – ანიტას სისხლის ჯგუფისა და რეზუსის დასამოწმებლად. როგორც აგვიხსნეს, მათი ჯანდაცვის სამინსტროს მიერ უნდა მოხდეს ტრანსპლანტაციის მომლოდინეთა რიგის გადამოწმება, რის შემდეგაც გადაწყდება ჩვენი ამბავი.
ამ ეტაპზე ვრჩებით ლოდინის რეჟიმში.
ანიტას საოცარი ამბავი გრძელდება!
მთელი ერი ველოდებით კლინიკის გამოჩენას, რომელიც ანიტას სამედიცინო მომსახურებას გაუწევს!
არ ვნებდებით! ვიბრძვით! მოვიგებთ! ” – წერს მარიკა ხუციშვილი.