“ბადრი ესებუა ვერა, მაგრამ თინა ბოკუჩავა ჩაანაცვლა და ნაციონალური მოძრაობის მერობის კანდიდატი გიგი უგულავა იქნება ფოთში. რელევანტურად დარჩენის სასოწარკვეთილი გზაა,” – ასე ეხმაურება ჟურნალისტი თამარ ჩერგოლეიშვილი გავრცელებულ იფორმაციას იმის შესახებ, რომ გაერთიანებული ოპოზიციის ფოთის მერობის კანდიდატი გიგი უგულავა იქნება.
“ვწუხვარ, რომ მაინც და მაინც ეს ადამიანი განასახიერებს ყველაფერს, რის გამოც ნორმალურ, წესიერ ადამიანს, შეიძლება პოლიტიკა უპრინციპო და ფლიდი ადამიანების ბინძურ საქმედ მიაჩნდეს, – წერს ჩერგოლეიშვილი სოციალურ ქსელში, პოსტის კომენტარებში კი აღნიშნავს: – “პირადად მე რომ მაგ ტიპს ამომრჩეველს აღარ ვაკადრებ, ზუსტად ვიცი და სხვები არ ვიცი რას იზამენ.”
გიგი უგულავას ოფიციალურად 21 აგვისტოს 18:00 საათზე წარადგენენ.
ცნობისთვის, “ნაციონალური მოძრაობის” ფოთის საქალაქო ორგანიზაციის თავმჯდომარემ რამდენიმე დღის წინ დააანონსა, რომ გაერთიანებული ოპოზიციიდან ფოთის მერობის კანდიდატი თინა ბოკუჩავა იქნებოდა, თუმცა, ეს გადაწყვეტილება შეიცვალა.