“ადამიანები აპროტესტებენ იმ განცხადებას, რომელიც ადასტურებს ევროკავშირისკენ სვლის პროცესს და მეორე მხრივ ამბობს, რომ თუ მოლაპარაკებების გახსნის პროცესი ხელოვნურად არის დაპაუზებული და ამას გარკვეული ზეწოლის იარაღად იყენებენ, ჩვენი მხრიდან დამატებით ეს საკითხი აქტუალიზებული არ იქნება, მანამ სანამ თავად არ გადაწყვეტენ რომ მოლაპარაკებები გახსნან, – განაცხადა საქართველოს პარლამენტის თავმჯდომარის მოადგილემ ნინო წილოსანმა „ქრონიკის“ ეთერში.
„ამის ფონზე, მე არ მინახავს არავინ, რომ ევროკავშირის წარმომადგენლობასთან მისულიყო და მოლაპარაკებების გახსნა მოეთხოვა. არ მინახავს კანდიდატის სტატუსის უსამართლოდ არ მოცემის გამო ამ ხალხის პროტესტი ან გულისწყრომა, როდესაც საქართველოს უსამართლოდ და დაუმსახურებლად არ მისცეს კანდიდატის სტატუსი. სიტუაციის არასწორი ანალიზი ხდება და არასწორად მიემართება აგრესია. იგივე ხდებოდა კანდიდატის სტატუსზე, ყალბი ემოცია, ხელისუფლების მიმართ, როდესაც ყველაფერს ვაკეთებთ იმისთვის, რომ ევროკავშირთან დაახლოების პროცესი წარმატებული იყოს, მათ შორის ყველაზე კარგი პარამეტრებით გამოირჩევა საქართველო სხვა კანდიდატ ქვეყნებს შორის და ამის პარალელურად, როცა სისტემატურად იჩაგრება შენი ქვეყანა, წარმოუდგენელია რას უნდა აპროტესტებდე პარლამენტის წინ. სამწუხაროა ასევე ის, რომ ევროპის მოტივით შეუძლია ამ პატარა პოლიტიკურ დაჯგუფებას ყველაზე არასწორი პროტესტი დააგენერირონ. ვის მიჰყავს ევროპაში ეს ადამიანები, უნდათ რომ სალომე ზურაბიშვილმა, ნიკა გვარამიამ, ლიაკა ხოშტარიამ ან გიორგი ვაშაძემ წაიყვანოს? ეს ხომ წარმოუდგენელია“, – განაცხადა წილოსანმა.