ამ წუთებში ბათუმში საოლქო საარჩევნო კომისიის შენობასთან აქცია იმართება. ადგილზე შეკრებილები არიან ოპოზიციური პარტიების წარმომადგენლები და მათი მხარდამჭერები.
აქციის მონაწილეები აცხადებენ, რომ “ქართულმა ოცნებამ” ხმებთან ერთად, ქართველ ხალხს ევროპული მომავალი მოჰპარა. მათივე თქმით, სწორედ ამიტომ საქართველოს თითოეული მოქალაქე ვალდებულია დაიცვას საკუთარი ხმა და კონსტიტუციით გარანტირებული საქართველოს ევროპული მისწრაფება.
“მიზნის საბოლოო მიღწევამდე, მსოფლიოს კიდევ ერთხელ უნდა გავაგონოთ, რომ ეს ქვეყანა გვეკუთვნის ჩვენ და არა რუსეთის მსახურ ოლიგარქ ივანიშვილს. ევროპული მომავალი ივანიშვილთან ერთად მოგვპარა გიორგი კალანდარიშვილმა და ცენტრალურმა საარჩევნო კომისიამ, სადაც ქართველო ხალხის ნება გადაწერეს და ოლიგარქის სასარგებლო შედეგები “დასვეს””, – აცხადებს აქციის ერთ-ერთი მონაწილე.