ისრაელში, პირველი ოქტომბრის ტერაქტს საქართველოს მოქალაქე ილია ნოზაძე ემსხვერპლა.
ისრაელის ტელევიზია გარდაცვლილების ვინაობას ასაჯაროებს – სოციალურ ქსელ facebook-ზე ვიდეო ვრცელდება.
ცნობისთვის, 1–ელ ოქტომბერს ირანმა ისრაელზე სარაკეტო შეტევა დაიწყო. ისრაელის თავდაცვით ძალებში განაცხადეს, რომ ირანმა ისრაელის მიმართულებით 180 ბალისტიკური რაკეტა გაუშვა. როგორც ისრაელის არმიაში აღნიშნეს, საჰაერო თავდაცვამ რაკეტების დიდი ნაწილი გაანეიტრალა. თავის მხრივ, თელ-ავივი აცხადებს, რომ თეირანის თავდასხმას ისრაელის მხრიდან საპასუხო რეაქცია მოჰყვება.
განცხადება გაავრცელა “ისლამური რევოლუციის გუშაგთა” კორპუსმაც, სადაც ნათქვამია, რომ, ისრაელის საპასუხო ქმედებების შემთხვევაში, თეირანის რეაგირება უფრო გამანადგურებელი იქნება.
ირანის ისლამური რევოლუციის გუშაგთა კორპუსში განაცხადეს, რომ ისრაელის წინააღმდეგ სარაკეტო თავდასხმა „ჰეზბოლას“ ლიდერის, ჰასან ნასრალას მკვლელობის საპასუხოდ განხორციელდა.