კირცხის საჯარო სკოლის უკვე ყოფილი დირექტორი, რომელიც დირექტორი მოვალეობას ასრულებდა ბოლო პერიოდში, მაცი ჯალაღონია, წერს, რომელსაც უცვლელად გთავაზობთ.
“ძვირფასო მეგობრებო! გუშინ ჩამოვიდა საქართველოს განათლებისა და მეცნიერების მინისტრის ბრძანება N 1017276, რომლის თანახმადაც მე უკვე არ ვარ კირცხის თემის N2 საჯარო სკოლის დირექტორის მ/შ.
თუ რა ხდებოდა ამ ბრძანების დაწერამდე, ეს გრძელი და ჩახლართული ამბავია. დადგება დრო და ამაზე აუცილებლად ვისაუბრებ, დარწმუნებული ბრძანდებოდეს ის, ვისაც ეს ეხება. ფარისეველი შურისმაძიებელი.
მე ჩემი კომპეტენცია 2 წელიწადში ორჯერ დავადასტურე.
კანონი ბევრის უფლებას იძლევა, მაგრამ ზოგჯერ მთავარი გვავიწყდება, მაგიური მეგრული სიტყვა ვაშინერს.
მე ამით ცხოვრება არ დამისრულებია. ნუ ექნება ვინმეს იმედი, რომ სულიერად დავეცემი და გავნადგურდები. ორი სტუდენტი შვილის ბედნიერი მამა ვარ, რომელთაც ვერავინ წამოაძახებს ცუდი მამის შვილები ხართო. ჩვენ მხარდამხარ ვივლით და ერთად დავძლევთ წარმოშობილ პრობლემებს. დაღმართს აღმართი მოჰყვება, ეს გაცნობიერებული მაქვს.
მე აქ არ დავიწყებ ვინმეს გინებას, ძაგებას. მე არ მაპატიეს ჩემი შემოქმედება, ის რომ ორი წიგნის ავტორი ვარ. არ მაპატიეს თავისუფლება. მე არსად მეჩქარება, ღმერთი ყოველთვის იქნება ჩემს გვერდით, ამაში დარწმუნებული ვარ.
ბოლო 4 თვე ჯოჯოხეთში გამატარებინეს და მადლობა მათ, ვინც გვერდით მედგა ამ ხნის განმავლობაში.
არაფერი დამთავრებულა. ყველაფერი კარგად იქნება. გფარავდეთ ღმერთი.