სამძებრო ოპერაცია მთელს საქართველოში – პოლიცია 24 წლის გოგოს გატაცებაში ბრალეულებს ეძებს, თუმცა 30 საათზე მეტია, ვერ პოულობს. ოთხი შეიარაღებული თავდამსხმელი მიმალვაშია.
გუნელ გასანოვა სამართალდამცავებმა ერთ-ერთ სოფელში იპოვეს. სოფელ კაბალიდან გატაცებულმა სტუდენტმა პოლიციას ჩვენება უკვე მისცა. “პირველების” ინფორმაციით, ქალმა თქვა, რომ მას მთელი ღამის განმავლობაში გამტაცებლები იარაღის მუქარით, მოკვლით ემუქრებოდნენ.
როგორც “პირველებს” გოგოს ახლობლებმა უთხრეს, გუნელ გასანოვა გამტაცებლების წინააღმდეგ სამართლებრივ ბრძოლას აპირებს.
სტუდენტი სოფელ კირბალიდან რამდენიმე საათის წინ გაიტაცეს, კადრებში რომელიც “პირველებმა” მოიპოვა, ჩანს, რომ ქალი ძალის გამოყენებით ჩასვეს მანქანაში, ფიზიკურად შეეხნენ ბებიას, რომელიც შვილიშვილის დახმარებას ცდილობდა.
ირკვევა, რომ გამტაცებლებმა გოგო თავდაპირველად სოფელ ყარაჯალას მიმართულებით წაიყვანეს. ოჯახმა სწორედ ამ სოფელში მიაგნო ავტომობილს, რომლითაც გამტაცებლები გადაადგილდებოდნენ.
გოგოს ოჯახის ინფორმაციით, გამტაცებელი 24 წლის კაცია, რომელიც სოფელ კაბალში ცხოვრობს. მოტაცების მიზანი კი იძულებით ცოლად შერთვაა.
საქმეზე გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.