“მოკლულებს შორისაა ბრალდებულის ბიძა, დაჭრილებს შორისაა მისი ბიძაშვილი” – ახალი დეტალები რუსთავში მომხდარ სროლაზე

რუსთავში, სტამბულის ბაზრობაზე, 5 ადამიანი დაჭრეს. ბაზრობის ტერიტორიაზე უცნობი პირი შეიჭრა და ცეცხლი მოვაჭრეებს გაიხსნა.

მომხდართან დაკავშირებით, შსს-მ საგანგებო განცხადება გაავრცელა.

„შინაგან საქმეთა სამინისტროს საზოგადოებრივი უსაფრთხოების მართვის ცენტრი 112-ში შემოვიდა შეტყობინება, ქალაქ რუსთავში, ე.წ. სტამბოლის ბაზრის ტერიტორიაზე განხორციელებული სროლის თაობაზე. შეტყობინების მიღებისთანავე ადგილზე დაუყოვნებლივ გამოცხადდნენ შინაგან საქმეთა სამინისტროს შესაბამისი დანაყოფების წარმომადგენლები.
დადგინდა, რომ ბაზრის ტერიტორიაზე რამდენიმე გასროლა განახორციელა 1988 წელს დაბადებულმა გ.ო.- მ.
სროლის შედეგად მოკლულია ოთხი პირი, მათ შორის ერთ-ერთი ბრალდებულის ბიძაა, რომელიც აღნიშნულ ბაზარში იყო დასაქმებული. ხოლო დაჭრილია ერთი პირი, ბრალდებულის ბიძაშვილი.
დაჭრილი საავადმყოფოში არის მოთავსებული, სადაც შესაბამისი სამედიცინო დახმარება უტარდება.
სამართალდამცველებმა გ.ო. შემთხვევის ადგილზე დააკავეს.
ადგილზე მობილიზებულები არიან სამართალდამცველები და ყველა შესაბამის ღონისძიებას ახორციელებენ“, – აღნიშნულია უწყების განცხადებაში.