დასავლეთ საქართველოში მოზარდმა იმშობიარა, არასრულწლოვნის გაუპატიურების ბრალდებით კი მამაა დაკავებული.
კაცს აღკვეთის ღონისძიების სახით ორთვიანი პატიმრობა უკვე შეეფარდა.
უცნობია, აღიარებს თუ არა მამაკაცი მის მიმართ წაყენებულ ბრალს.
თანასოფლელის თქმით, მას შემდეგ, რაც მოზარდმა იმშობიარა, თქვა, რომ მასზე სექსუალურად მამამ იძალადა:
„ბავშვი საავადმყოფოში გამოკითხეს. იქ მოყვა, რომ მას ორი წლის განმავლობაში აუპატიურებდა მამა. სადმე თუ იტყვი, ყველას დავხოცავო, ემუქრებოდა ბავშვს“,- ამბობს „რადიო თავისუფლებასთან“ ადგილობრივი.
გამოცემა ასევე ესაუბრა სოფლის სკოლის დირექტორს, რომელიც ამბობს, რომ 17 წლის გოგომ სკოლა გასულ წელს დაამთავრა: „2023 წელს დაასრულა 12 კლასი. 5 წლის შევიდა სკოლაში, მაშინ ასაკობრივი შეზღუდვა არ იყო. ის და მისი ექვსი წლის ძმა ერთად შემოიყვანეს სკოლაში“.
სკოლის დირექტორი ამბობს, რომ ყოფილი მოსწავლისთვის არასდროს შეუმჩნევიათ, რომ ის შესაძლოა, ძალადობის, მათ შორის, სექსუალური ძალადობის მსხვერპლი იყო.
დირექტორის თქმით, შვილის სასკოლო ცხოვრებაში დედასთან ერთად აქტიურად იყო ჩართული მამაც:
„მოდიოდა, ყურადღებიანი მშობელი იყო. ამ გოგონას გარდა, ჩვენს სკოლაში მისი და-ძმებიც სწავლობენ“.
უფრო ვრცლად წაიკითხეთ ბმულზე.