სოციალურ ქსელში გავრცელდა ინფორმაცია, რომლის მიხედვითაც, წმინდა მატრონას ხატზე დავით თარხან-მოურავი და ირმა ინაშვილია გამოსახული.
აღნიშნულს „პატრიოტთა ალიანსის“ ლიდერი, ირმა ინაშვილი, ჟურნალისტ ირაკლი აბსანძის facebook-პოსტზე გამოეხმაურა.
„გამიხარდებოდა, ასეთი დახვეწილი სახე და ცხვირი რომ მქონდეს, მაგრამ არა მაქვს. ამ გოგონას გვერდით რომ მამაკაცია, ის (თქვენი ლოგიკით) სერგი კაპანაძე იქნება, სიბერეში…“, – დაწერა ინაშვილმა.
ამასთან, ზემოაღნიშნულ ინფორმაციას „ტვ პირველთან“ ინტერვიუში დავით თარხან-მოურავიც გამოეხმაურა.
შეგახსენებთ, სოციალურ ქსელში ერთ-ერთმა მომხმარებელმა დაწერა: „როდემდე უნდა გაგრძელდეს ფაქტების მალვა ხალხო ❗️❗️❗️ აქციებს რომ ატარებენ და ვიღაცეების დასჯას რო ითხოვენ, წმინდა მატრონას ხატზე სტალინთან შეხვედრის სცენის გარდა ასევე გამოსახულები არიანო ინაშვილი და თარხანმოურავი. დაჩოქილები ლოცულობენ და ევედრებიან არჩევნებში გამარჯვებას. მარცხენა კუთხეშია ეს. დაიწყეთ ეხლა არ დაგვინახავს, არ შეგვიფასებია, საინტერესოა ვისი დავალებით შეიტანა ეს ხატი ირმამ და თარხანამ სამებაში. გეკითხათ თავის დროზე სამებაში მღვდლებისთვის და გეტყოდენ ვინც დართო ნებართვა. გამოვიდნენ ახლა საპატრიარქოდან და თქვან ვისი დავალებით შეიტანეს. თუ ასე არაა მაშინ რატო გადამალეს ხატი და რატო არ სცემენ პასუხს ქუჩაში გამოსულ ხალხს ვიღაცის დასჯას რო ითხოვენ, უთხრან მათ ვისი ბრალია და აღიარონ თავად“.
წმ. მატრონას ხატი, რომელზეც საბჭოთა ბელადი, იოსებ სტალინიცაა გამოსახული, სამების საკათედრო ტაძარს სწორედ ირმა ინაშვილმა და დავით თარხან მოურავმა შესწირეს.
რამდენიმე დღის წინ, საპატრიარქომ, აღნიშნულ ხატთან დაკავშირებით, საგანგებო განცხადება გაავრცელა, სადაც ნათქვამია, რომ ხატზე „სტალინის ეპიზოდი უნდა შეიცვალოს“.