„ბიზნესის წარმომადგენლებს უნდა ვთხოვოთ, რომ აუცილებლად გააკონტროლონ. რამდენიმე მაღაზია ჩემს ირგვლივ – სიცხეს ზომავდნენ, დეზობარიერი იყო. ბოლო ერთ კვირაა შევდივარ და ვითხოვ ტემპერატურის გაზომვას, მაგრამ ამას არ აკეთებენ. თუ ასე გაგრძელდა, აპრილის ბოლოდან აუცილებლად იქნება მესამე ტალღა“,- ამის შესახებ ალერგოლოგ-იმუნოლოგმა ბიძინა კულუმბეგოვმა „პირველი არხის“ ეთერში განაცხადა.
მისი თქმით, მოქალაქეების მიერ რეგულაციების დაცვაზეა დამოკიდებული, დაემუქრება თუ არა ქვეყანას კორონავირუსის მესამე ტალღა.
„პირბადე ერთადერთი საშუალება რჩება, სხვას ყველაფერს ვხსნით. უზარმაზარი რისკის წინაშე ვდგებით. იმ რეკომენდაციებსაც უნდა დაცვა, როგორიცაა დისტანცია, ტრანსპორტში ქცევა. ჩვენზეა დამოკიდებული ჩვენი თანამოქალაქეები საავადმყოფოებში მოხვდებიან თუ არა“, – აღნიშნა ბიძინა კულუმბეგოვმა.
კულუმბეგოვის განმარტებით, ქვეყნის მოსახლეობის დაახლოებით 20%-ს უკვე აქვს იმუნიტეტი ინფექციის წინააღმდეგ.
„ქვეყანამ უნდა მოახერხოს მოთხოვნის შესაბამისი ვაქცინების შემოტანა. საზოგადოებას გარკვეული იმუნიტეტი აქვს, დაახლოებით 20%-მდე, დაახლოებით 60% თუ დაემატა ვაქცინირებულების ფენა წლის ბოლომდე, საზოგადოების 80%, რომელიც ანტისხეულებს ატარებს, გარანტიაა იმის, რომ ჩვენ ქვეყანაში ცხოვრებაში შეიძლება, პირვანდელ ყოფას დაუბრუნდეს“, – განაცხადა ბიძინა კულუმბეგოვმა.