ცნობილი ტელედიქტორი ნუგზარ ჯუღელი ერთ-ერთი მათგანია, ვისაც ქვეყანაში ტელელეგენდებად თვლიან. მან საქართელოს ტელევიზიის „პირველ არხზე“ 36 წელი იმუშავა. იყო სანფორმაციო გადაცემა „მოამბის“ წამყვანი და სპორტის კომენტატორი. ის 2019 წლის სექტემბერში 82 წლის ასაკში გარდაიცვალა.
ცნობილ ტელეწამყვანის მიერ დატოვებულ ანდერძს ჟურნალ „სარკესთან“ მისი შვილიშვილი, ლიკუნა რევიშვილი იხსენებს:
„უცნაური ამბავი ის არის, რომ გარდაცვალებამდე ეს ანდერძი არავის გვინახავს. არადა ოთხი წელი იწვა და მის ნივთებში მხოლოდ ჩვენ ვიქექებოდით. თავის უჯრაში ჰქონდა რაღაც ძველებური ნივთები და მსიამოვნებდა მასში ქექვა. ის წერილი კი მართლა არავის ჰქონდა ნანახი, რაც ძალიან უცნაური იყო. შოკი იყო ამ წერილის პოვნის ამბავი.
იწყებოდა იმით, თუ ამას კითხულობთ, ესეიგი აღარ ვარო. გვთხოვდა, არავინ შეგვეწუხებინა. მთელი ცხოვრება ასე იყო – არავინ, არასოდეს შეუწუხებია. წერდა, ესეიგი ჩემს ლამაზ დედასთან წავედიო. სულ ამბობდა, სიკვდილის არ მეშინიაო. მამაჩემი 27 წლის ასაკში გარდაიცვალა და გიჟდებოდა, ისე უყვარდა თავისი სიძე ნუგზარს. დედაჩემი ხუმრობდა ხოლმე, მე უფრო ვიყავი ნუგზარისთვის რძალი, ვიდრე გია სიძეო.
გვწერდა, რომ არავის ენახა მისი ცხედარი, გარდაცვალებიდან მესამე დღეს დაგვეკრძალა და ქელეხი არ გადაგვეხადა. თუ საშუალება გექნებათ, ვინმე ბავშვს დაეხმარეთ და მას აჩუქეთ სიცოცხლე ჩემს სახელზეო. ასეც მოვიქცეით. დედაჩემმა სოციალურ ქსელში ნახა ბავშვის ფოტო, რომელიც იწვა იაშვილის კლინიკაში და ონკოლოგიური დაავადება ჰქონდა. დედა მივიდა მშობლებთან, უთხრა, რომ მათთან კონვერტი გაატანეს, დაუტოვა ფული და გამოიქცა. ყველაფერი ისე შევასრულეთ, როგორც ნუგზარს უნდოდა.
ვერ იტანდა ქელეხებსა და ღრეობებს. ცხოვრებაში ხორცი არ უჭამია, ვეგეტარიანელი იყო. სახლში მისვენებულს როგორ ეფერებოდა ჩვენი ძაღლი, არასოდეს დამავიწყდება. კოცნა რომ დაუწყო, ვერ მოაშორეს. საფლავიც მორიდებული გამიკეთეთ, ქვა არ დამადგათო, ითხოვდა წერილში. დედაჩემის გარდა, არავის უნახავს მიცვალებული ნუგზარი“, – ყვება ნუგზარ ჯუღელის შვილიშვილი, ლიკუნა რევიშვილი.
