21 ნოემბერს მსოფლიო მართლმადიდებლური ეკლესია მთავარანგელოზობის დღესასწაულს აღნიშნავს.
ქრისტიანობაში ცნობილია, რომ მთავარანგელოზნი უფლის ნებას გვაუწყებენ, გვიხსნიან სარწმუნოების საიდუმლოებებსა და წინასწარმეტყველებებს. როგორც წესი, ანგელოზები ყველაზე ახლოს დგანან ადამიანებთა, არასოდეს გვტოვებენ და მუდამ მზად არიან ჩვენს დასახმარებლად.
ყველაზე მაღლა მდგომი ანგელოზები არიან სერაბიმნი, ქერუბიმნი და საყდარნი.
საშუალო იერარქიას შეადგენენ : უფლებანი, ძალნი და ხელმწიფებანი.
უმდაბლესი იერარქია მოიცავს სამ დასს: საწყისნი, მთავარანგელოზნი და ანგელოზნი.
ანგელოზთა დასის მთავრად დადგენილია მთავარანგელოზი მიქაელი, რომელმაც გამოდევნა სასუფევლიდან სატანა და მისი მიმდევრები. მიქაელ მთავარანგელოზის სახელზე ლოცულობენ დემონურ ცდუნებათა დროს.
რატომ აღინიშნება მათი ხსენება 21 ნოემბერს და არა სხვა დღეს?
დღესასწაული აღინიშნება მარტიდან (საიდანაც ძველად წელიწადის ათვლას იწყებდნენ) მეცხრე თვეს — ნოემბერში, რაც ანგელოზთა ცხრა დასს შეესაბამება. თვის მერვე დღე მიგვანიშნებს ყოველთა უხორცოთა ზეცისა ძალთა შეკრებაზე „დღესა მერვესა“, როგორც წმიდა მამები უწოდებენ უფლის მეორედ მოსვლასა და საშინელ სამსჯავროს.
ამ დღეს უნდა ვეცადოთ გავიღოთ მოწყალება, დავანთოთ სანთელი მათ სახელზე, ვეზიაროთ და დიდება შევწიროთ ანგელოზთა დასს
ტროპარი:
„ზეცისა მხედრობათა მთავარანგელოზნო, გევედრებით ჩუენ უღირსნი ესე, რაითა მეოხებითა თქუენითა შემზღუდნეთ ჩუენ საფარველითა ფრთეთა თქუენთაითა, და უხორცოსა მის დიდებისა თქუენისა მიერ დაცულნი შეგივრდებით და ხელაღპყრობით გიღაღადებთ: ღელვათა და განსაცდელთაგან გვიხსნენით ჩუე, დიდნო მთავარნო ზეცისა ძალთანო.“