ჯანდაცვის ექსპერტმა, ექიმმა მაიკლ მოსლიმ ისაუბრა ვარჯიშზე, რომელიც წელის ტკივილის მოსახსნელად და შფოთვის დასახმარებლად გამოიყენება.
პილატესი – ეს არის ნაზი ვარჯიში, რომელსაც შეუძლია გაგხადოთ ძლიერი, მოქნილი და გააუმჯობესოს თქვენი პოზა და წონასწორობა. თავის პოდკასტში მაიკლმა ილაპარაკა პილატესის სასარგებლო თვისებების შესახებ.
„თუ პილატესს სცდით, ალბათ გაგიკვირდებათ, როცა აღმოაჩენთ, რომ მოძრაობები ხშირად მცირეა და ერთი შეხედვით მარტივი. მაგრამ იდეა ისაა, რომ თუ თქვენ ნამდვილად გაამახვილებთ თქვენს გონებას თითოეულ პატარა მოძრაობაზე, დახვეწავთ თქვენს უნარს გააკონტროლოთ ღრმა კუნთები“.
ამასთან, არსებობს კვლევა, რომელშიც ნაჩვენებია, რომ 6 კვირის პილატესის შემდეგ, ჩოგბურთელებს შეეძლოთ თითქმის ხუთი მილი საათში უფრო სწრაფად გაერბინათ.
ასევე, 2021 წელს ჩატარებული კვლევის მიხედვით, მათ, ვინც გაიარეს პილატესის რვაკვირიანი პროგრამა, შეუმცირდათ ზურგის ტკივილი და გაუუმჯობესდათ ცხოვრების ხარისხი.
მაიკლმა ასევე ხაზი გაუსვა იმას, თუ როგორ შეუძლია პილატესს ხელი შეუწყოს შფოთვის სიმპტომების შემცირებას სუნთქვაზე ფოკუსირების გამო.
მან განმარტა: „პილატესი ასევე ხაზს უსვამს ნელი ღრმა სუნთქვის მნიშვნელობას, ცხვირით ჩასუნთქვას და შემდეგ ხანგრძლივი ნელი, ძლიერი ამოსუნთქვა. ამის გამო, ვარჯიშს ასევე შეუძლია შეამციროს შფოთვა“.
პოდკასტში პილატესის ექსპერტმა, პროფესორმა რუთ მელომ, გამოავლინა ვარჯიშის სარგებელი ხანდაზმული ადამიანებისთვისაც.
„ჩვენ ჩავატარეთ ტესტი, რათა გამოგვეკვლია პილატესის სარგებელი ხანდაზმულ ქალებში. 12 კვირის განმავლობაში ისინი კვირაში ორჯერ ასრულებდნენ პილატესის ვარჯიშს. ჩვენ გავზომეთ ბალანსის ზოგიერთი ასპექტი, როგორიცაა სტატიკური და დინამიური ბალანსი. ჩვენ ასევე გავზომეთ გულ-სისხლძარღვთა გამძლეობა. 12 კვირის შემდეგ აღმოვაჩინეთ, რომ ჯგუფის წევრებს გაუუმჯობესდათ ქვედა სხეულის ძალა და დინამიური წონასწორობა“ – ამბობს ექსპერტი.