გუშინ უფლებადამცველმა ლევან ჭელიძემ სოციალურ ქსელი გაავრცელა ინფორმაცია, რომლის თანახმადაც, მას ქუთაისის ციხიდან პატიმარი დაუკავშირდა და განუცხადა, რომ არაადამიანურად ეპყრობიან.
ჭელიძე აღნიშნავდა, რომ პატიმარს ტელეფონი გაეთიშა და, სავარაუდოდ, ის გაუთიშეს.
ამ საკითხზე „მეტრონომი“ ლევან ჭელიძეს დაუკავშირდა.
„პატიმრისთვის ტელეფონის გათიშვის შემთხვევა ჩემთვის პირველი იყო.
მსჯავრდებულები რამდენიმე დღის წინაც შიმშილობდნენ. ერთ-ერთი მათგანი ამბობდა, რომ არ ეწეოდა სათანადო სამედიცინო დახმარება. ისინი პრეტენზიას გამოთქვამდნენ ციხის ადმინისტრაციასთან მიმართებით.
რაც შეეხება გასულ კვირას, ვადასტურებ, რომ ციხეში ბუნტი ნამდვილად იყო.
მაშინ სახალხო დამცველმა თქვა, რომ ამ დროისთვის იქ არაფერი ხდებაო. ამ დროში იგულისხმება 20:52 საათი, რადგან ლევან იოსელიანის პოსტი ამ დროს გამოქვეყნდა.
როცა იურისტები ვწერდით, რომ პრობლემა იყო 23:00, 24:00 და ღამის 01:00 საათებში, სახალხო დამცველის წარმომადგენელი 21:00 საათზე ვისთან და რატომ შევიდა ციხეში?
რეალობა კი ასეთი იყო – იმ დღეს ჩემი კოლეგები შევიდნენ ციხეში. დაწესებულებაში ისმოდა ძალიან დიდი ხმაური. იმ პატიმრებს, რომლებიც მონაწილეობდნენ ბუნტში, ადვოკატებს არ ახვედრებდნენ, იმიტომ რომ, სავარაუდოდ, ნაცემები იქნებოდნენ.
ასევე გავრცელდა ინფორმაცია, რომ იმ საღამოს 20 პატიმარი იყო საავადმყოფოში გადაყვანილი. ან სცემეს მათ, ანაც პატიმრებმა თვითდაზიანებები მიიყენეს.
ამასთან დაკავშირებით ზუსტ ინფორმაციას მე ვერ გეტყვით, მაგრამ პენიტენციალურ დაწესებულებაზე მარტივად შეუძლია თქვას კი ან არა. დაწერონ საჯაროდ“, – განაცხადა ლევან ჭელიძემ „მეტრონომთან“ ინტერვიუში.