ოზურგეთში, ექადიის უბაში, წმინდა გიორგის ქუჩაზე, სტიქიის დროს არაერთხელ დაზარალდა აქ მცხოვრები მაკა გობრონიძე, თავის არაჩვეულებრივი ვარდების ბაღითა და მეურნეობით. ძირითადად, ეს ხდება ექადიის ტყე-პარკის რეაბილიტაციასთან დაკავშირებული სამუშაოების გამო.
როგორც ქალბატონი მაკა ამბობს, არასწორად დაგეგმილმა სანიაღვრე არხიდან მოვარდნილმა ღვარცოფმა, არაერთხელ იავარქმნა მისი სასოებით მოვლილი კარმიდამო. შევარდა სახლში და პირველ სართულზე ყველაფერი დააზიანა.
ასე მოხდა ამჯერადაც.
_რა უნდა ვქნათ? ვინაა პატრონი? ხრეშის გორა პირდაპირ დაყარეს გზაზე და ნახევრად არხში ჩაიყარა. კიდევ გზის გადაკეტვა უნდოდა აქ ღვარცოფს? ახლა ისევ ჩემი მეუღლე მუშაობს. ძლივს ჩამოიყვანა ტრაქტორი, ხუთი წუთით დმეხმარეო ეხვეწა მემანქანეს, რომელიც აღნიშნული პარკის რეაბილიტაციაზე მუშაობს. ჩემი საქმე არაა ესო, იძახდა. აბა, ვისი საქმეა? მე დავყარე აქ ამდენი ხრეში? ან ეს სანიაღვრე არხი ასე დაბრეცილად ჩვენ ჩავსვით?_ ამბობს მაკა გობრონიძე.
ახლა წმენდენ არხს. თუმცა, მაკა გობრონიძე ამბობს, რომ აქ, მუნიციპალური სივრცეში არსებული არხის კიდებს და შიგა სივრცეს მისი მეუღლე აწესრიგებს.
_რა ვქნათ? ახლა ჩვენი ძალებით ვცდილობთ, გავაკეთოთ და მოვაწესრიგოთ. ისეთი ამბები მოხდა, ცოცხლები რომ ვართ, მგონი, ესაა მთავარი. ახლა ჩვენთვის ვის სცალია. ისე კი კაციშვილი არ იყო მაინც მომსვლელი და მომხმარე. დაპირება, იცოცხლე! ისევ ჩვენ უნდა მივხედოთ. ღმერთმა ნუ ქნას კიდევ ისეთი წვიმა და ღვრცოფი. არ ვიცი, რა გვეშველება, _ ამბობს ქალბატონი მაკა.
წყარო: „გურია ნიუსი“