გზებზე მანქანების გამონაბოლქვის კონტროლი იწყება. ინსპექტირების პროგრამა, სექტემბრიდან, საქართველოს 4 ქალაქში – თბილისში, ქუთაისში, ბათუმსა და რუსთავში ამოქმედდება.
გარემოსდაცვითი ზედამხედველობის დეპარტამენტის თანამშრომლები ქუჩებში იმოძრავებენ და როდესაც ავტომობილის ზედმეტ გამონაბოლქვს ვიზუალურად შეამჩნევენ, გააჩერებენ, რის შემდეგაც შესაბამისი ტექნიკით შეამოწმებენ.
ზღვრული ნორმების დარღვევის შემთხვევაში ფიზიკურ და იურიდიულ პირებს გარკვეული ოდენობის ჯარიმის გადახდა მოუწევთ. ფიზიკური პირებისთვის პირველ ჯერზე ფულადი სანქცია 100 ლარი იქნება, განმეორების შემთხვევაში – 300 ლარი, ხოლო, მესამედ დაფიქსირებისას, ჯარიმა 600 ლარამდე გაიზრდება. იურიდიული პირების შემთხვევაში, ჯარიმა 500 ლარიდან იწყება და 3000 ლარამდე იზრდება.