გორში, 4 წლის ბიჭის გარდაცვალების ოფიციალურ მიზეზად გართულებული ჩუტყვავილა სახელდება. ბავშვის ოჯახის წევრების თქმით, როცა ინფექციური დაავადების ნიშნები გამოვლინდა, მაშინვე მიმართეს ექიმს, თუმცა მცირეწლოვანს დაავადება მაინც გაურთულდა. ბავშვის ბებიის თქმით, ექიმმა ბავშვს დახმარება დროულად არ გაუწია.
“ნაბიჯსაც არ მოუჩქარა, რომ ცუდად არის ბავშვი და ჩქარა მივხედოთ. ვეუბნები, ჩქარა ცუდად არის, ან გადასხმა გაუკეთეთ ან რამე -მეთქი და ჯერ ისტორია უნდა შევავსოო. რა დროს ისტორიაა, ბავშვი კვდება მეთქი. მაშინ თბილისიდან გამოვიძახოთ სასწრაფოო, ოღონდ ჯერ საბუთები უნდა შევავსოთო, მერე დავურეკოთო. ჩვენ ვუთხარით, რომ დრო აღარ არის, დავავლეთ ხელი ამ ბავშვს წამივიყვანეთ, გზაში პატრული დავინახეთ, ჩემმა შვილიშვილმა სთხოვა მიგვაყვანინეთ სწრაფად ბავშვი საავადმყოფომდეო, ამ დროს ბავშვმა უკვე გონება დაკარგა, პატრულმა ბავშვი თავის მანქანაში ჩასვეს და წაიყვანეს, ახლოს ვიყავით საავადმყოფოსთან, პატრულმა საავადმყოფოს კარი ლამის შეანგრია ისე შეიყვანა ბავშვი, მაგრამ უკვე გული ჰქონდა გაჩერებული”, – ამბობს ბავშვის ბებია.
მისი თქმით, ჩუტყვავილას სიმპტომების გამოვლენისთანავე მიმართეს ოჯახის ექიმს, რომელმაც თავდაპირველად მხოლოდ მალამო და რამდენიმე მედიკამენტი დაუნიშნა.
“მეოთხე დღე იყო გამოვლენის, ძალიან რომ გამოაყარა და ექავებოდა, მივიყვანეთ ოჯახის ექიმთან. მაშინვე თქვა, რომ ესეთი რთული ფორმა არ მინახავსო, თუ გართულებული ჰქონდა, მარტო მალამო და წამლები დაუნიშნა, ბეტადინით დაუმუშავეთო. არც ანალიზების გაკეთება გვითხრა. იმ მალამომ არ უშველა, ქავილი ისევ ჰქონდა, დავურეკეთ და შეუცვალა სხვა მალამოთი. მერე დავურეკეთ, რომ კუნთი გაუმაგრდა და დაუსივდა, თურმე სეფსის სცოდნია ასე და ექიმმა ეს არ უნდა ეთქვა? მეორე დღეს მაღალი სიცხეები ჰქონდა. ექიმს რომ დავურეკეთ, ხვალ დილით მოიყვანეთ და ინფექსციურში გავწერთ თბილისშიო, მაგრამ გათენებამდე ვეღარ გავძელით, ბავშვი ამბობდა ვერ ვსუნთქავო, – ამბობდ ლამარა ლაფერაშვილი.