გვიან ღამით, ვაზისუბანში ავტოსაგზაო შემთხვევას 3 ადამიანი ემსხვერპლა. მსუბუქი ავტომობილი გზის სველი ზედაპირის გამო, მოცურდა და ხევში გადავარდა. შემთხვევის შედეგად 2 ადამიანი კლინიკაშია მოთავსებული.
არსებული ინფორმაციით, ავტომობილში, რომელიც ნაწვიმარ გზაზე მოცურდა და ხევში გადავარდა, 5 ახალგაზრდა იმყოფებოდა, მათ შორის სამი გარდაიცვალა, ხოლო ორი საავადმყოფოშია გადაყვანილი და მათი მდგომარეობა ამ დროისთვის სტაბილურია.
გარდაცვლილები გიორგი ოსიპოვი, გიორგი ზანდარაშვილი და საჭესთან მჯდომი გიორგი გონაშვილი არიან. მათგან ორი 19 წლის, ხოლო ერთი 20 წლის იყო.
ერთ-ერთი დაღუპული თბილისის სახელმწიფო უნივერსიტეტის სტუდენტი იყო.
“თსუ ჰუმანიტარულ მეცნიერებათა ფაკულტეტი ღრმა მწუხარებით იუწყება, რომ ტრაგიკულად დაიღუპა ისტორიის საბაკალავრო პროგრამის მე-2 სემესტრის სტუდენტი გიორგი ზანდარაშვილი.
თსუ ჰუმანიტარულ მეცნიერებათა ფაკულტეტი სამძიმარს უცხადებს გარდაცვლილის ოჯახსა და მეგობრებს”