ჯანმრთელობის მსოფლიო ორგანიზაცია შეშფოთებულია კორონავირუსის გავრცელების შემთხვევებით ევროპასა და ჩრდილოეთ და სამხრეთ ამერიკაში. აცხადებს ორგანიზაციის ხელმძღვანელი ტედროს ადჰანომ ღებრეიესუსი.
“უკიდურესად შეშფოთებულები ვართ კოვიდ-19-ის შეთხვევების აფეთქებებით ევროპასა და ამერიკის რეგიონში. ჯანდაცვის სისტემები კოლაფსის წერტილს მიუახლოვდნენ”, – აცხადებს ღებრეიესუსი.
ამასთან, ღებრეიესუსი გამოთქვამს ფრთხილ ოპტიმიზმს სხვადასხვა ქვეყანაში შემუშავებული კორონავირუსის ვაქცინების ეფექტურობის შესახებ მიღებული ინფორმაციების გამო.
მისივე თქმით, კორონავირუსის პანდემიას მხოლოდ ვაქცინა ვერ შეაჩერებს და მას მხოლოდ მისი შეკავება შეუძლია.
“COVID-19-ის პანდემიის დასაწყისიდანვე ვიცოდით, რომ ვაქცინა აუცილებელია პანდემიის შეკავებისთვის. მაგრამ მნიშვნელოვანია ხაზი გავუსვათ, რომ ვაქცინა შეავსებს ჩვენს ხელთ არსებულ სხვა საშუალებებს და არ ჩაანაცვლებს მათ”, – წერს “ტვიტერზე” ღებრეიესუსი.