კორონავირუსის ეპიდემიის გამო, დღეიდან საქართველოში დამცავი ნიღბის გამოყენება სავალდებულო გახდა ღია სივრცეშიც. მანამდე ეს წესი დახურულ სივრცეზე ვრცელდებოდა.
საქართველოს მასშტაბით, რესტორნები და კაფეები 22:00 საათამდე იმუშავებენ. დღემდე ეს შეზღუდვა ვრცელდებოდა თბილისზე, მცხეთაზე ბათუმსა და იმერეთის რეგიონზე.
25 ნოემბრამდე სწავლა დისტანციურ რეჟიმში გაგრძელდება თბილისის, ქუთაისის, რუსთავის, თელავის, ზუგდიდის, ზესტაფონის, გორის, ფოთის, მარნეულისა და გარდაბნის სკოლებში.
ეს გადაწყვეტილებები 3 ნოემბერს მიიღო უწყებათაშორისმა საკოორდინაციო საბჭომ, რომელსაც ვიდეოკონფერენციის ფორმატით ხელმძღვანელობდა პრემიერ-მინისტრი გიორგი გახარია. მას კორონავირუსი აქვს.
3 ნოემბერს, საქართველოში დადასტურდა კორონავირუსის 1943 ახალი შემთხვევა, რაც ეპიდემიის პერიოდში, 24 საათში დაფიქსირებული ყველაზე მაღალი მაჩვენებელია.