უკვე საათზე მეტია სოაციალურ ქსელში დიდი განხილვის თემაა – თავისუფლების მოედანზე “ნაციონალური მოძრაობის” სიის ნომერმა პირველმა – ლეგენდარულმა არტისტმა, ბუბა კიკაბიძემ ქართული სიმღერის ნაწილი რუსულად იმღერაო.
ცოტა ხანში თავად გამოვიდა სცენაზე და თქვა, კარგად რომ გაიგონ როგორი ქვეყანა გვაქვს, ამიტომ ვიმღერე რუსულადო.
ახლა კი ვიგებთ – არტისტს ფონოგრამა შეცდომით ჩაურთესო. აი, რა განმარტებას აკეთებს კიკაბიძის მუსიკალური პროდიუსერი
რატი აბზიანიძე: – ეს იყო სრულიად ტექნიკური შეცდომა. ხმის რეჟისორს აერია და ფონოგრამის ის ვერსია გაუშვეს, რომლითაც ბატონი ბუბა საზღვარგარეთ ასრულებს. სიმღერისას მიხვდა, ბუნებრივია და ძალიან ინერვიულა. ახლაც მაგრად ნერვიულობს.
– თუმცა სცენაზე თქვა, რომ გაეგოთ როგორ ქვეყანაში ვცხოვრობ, ამიტომ ვიმღერე “ორი კუპლეტი” რუსულადო.
– ეს იმ სიტუაციიდან გამოსავალი იპოვა და ამიტომ თქვა. ძალიან წუხს, რომ ასეთი ტექნიკური შეცდომა მოხდა. ბუბა ის ადამიანი არ არის, სხვისი შეცდომა დაასახელოს. თავის თავზე აიღო ის შეცდომა და სცენაზე ის განცხადება ამიტომაც გააკეთა.
ადამიანი 2008 წლის შემდეგ რუსეთში არ ჩადის მილიონი მოწვევის შემდეგ და სირცხვილია ის, რასაც “ფეისბუქზე” მისი მისამართით ვკითხულობ.