საგანგებო სიტუაციების მართვის სამსახური ინფორმაციას ავრცელებს მესტიის სოფელ ლატალის მიმდებარედ გაჩენილ ხანძარზე. მათი თქმით, ცეცხლი ლოკალიზებულია, ამჯერად კი მისი სალიკვიდაციო სამუშაოები მიმდინარეობს.
მიუვალი ადგილის გამო, მეხანძრეებს ადგილზე მისვლა გაუჭირდათ. გვიან ღამით, ადგილზე ჩავიდნენ საგანგებო სიტუაციების მართვის სამსახურის დამატებითი ჯგუფები თბილისიდან და იმერეთიდან.
სოციალურ ქსელში გავრცელდა კადრები, რომელშიც ასახულია, როგორ შეუპოვრად ცდილობენ სვანი ქალები შიშველი ხელებით და საკუთარი ძალებით ჩააქრონ ცეცხლი იმ ადგილებში, სადაც სახანძრო ვერ მივიდა.
ამ დროისთვის, ხანძრის კერებთან მუშაობს ცოცხალი ძალა – 125 მეხანძრე-მაშველის შემადგენლობით და 10 ერთეული ტყის ხანძრის ქრობისთვის განკუთვნილი სპეციალური ტექნიკა.
ადგილზე სამუშაოებს სახანძრო-სამაშველო ძალების დეპარტამენტის უფროსი დავით სუხიშვილი ხელმძღვანელობს.
წყარო: “პრაიმტაიმი.”