წყალშავის საჯარო სკოლა სამწუხარო ინფორმაციას ავრცელებს. გარდაიცვალა ღვაწლმოსილი პედაგოგი ნელი ციცქიშვილი.
“სსიპ ჭიათურის მუნიციპალიტეტის სოფელ წყალშავის საჯარო სკოლის თანამშრომლები ღრმა მწუხარებას გამოვთქვამთ ჩვენი პედაგოგის, ქალბატონი ნელი ციცქიშვილის მოულოდნელი გარდაცვალების გამო და სამძიმარს ვუცხადებთ მის ოჯახსა და ახლობლებს.
ქალბატონი ნელი, 53 წლის განმავლობაში მუშაობდა წყალშავის საჯარო სკოლაში, ქართული ენისა და ლიტერატურის მასწავლებლად. იგი დიდ პატივისცემას იმსახურებდა პიროვნული თვისებებისა და საქმისადმი ერთგული, პატიოსანი დამოკიდებულების გამო. იგი გამოირჩეოდა კოლეგებისა და მოსწავლეების მიმართ კეთილგანწყობით, ყურადღებით, უსაზღვრო მზრუნველობით, მუდამ გამოხატავდა სითბოსა და თანადგომას მოსწავლეებისა და კოლეგების მიმართ. საქმიან ურთიერთობებში დაუზარებლად მოქმედებდა, მაღალი პროფესიონალიზმითა და დიდი პასუხისმგებლობით ეკიდებოდა დაკისრებულ მოვალეობებს და ქმნიდა ურთიერთპატივისცემაზე დამყარებულ კომფორტულ სამუშაო გარემოს.
ცხოვრებისადმი უშრეტი სიყვარული იგრძნობოდა ქალბატონი ნელის განსაკუთრებულ დამოკიდებულებაში მოსწავლე-ახალგაზრდების მიმართ. იგი გულწრფელად ხარობდა მათი წარმატებებით, უშურველად უზიარებდა საკუთარ გამოცდილებასა და ცოდნას.
ქალბატონი ნელი განუზომელი დანაკლისია ოჯახის, ახლობლების, კოლეგებისა და მოსწავლე-ახალგაზრდებისათვის.
ქალბატონო ნელი გვაკლიხარ. მოგვენატრები….”