“იყო საშინელი სროლის ხმა”, – ასე იხსენებს 20 იანვრის ღამეს საგარეჯოში თავდასხმას საგარეჯოს საავადმყოფოს, „ჯეოჰისპიტალსის“ საგარეჯოს ფილიალის ექთანი ნანა კევლიაშვილი.
ის წუხელ მორიგე იყო – ერთ-ერთი იმ მედიკოსებს შორის, ვინც დაჭრილების გადარჩენისთვის იბრძოდა.
ნეტგაზეთთან საუბარში ის იხსენებს, რომ სროლა დაახლოებით 01:00 საათისთვის დაიწყო და დაახლოებით ერთ საათს გაგრძელდა.
„აფეთქების ხმა არ გამიგია, მაგრამ იყო საშინელი სროლის ხმა. დაჭრილები მალევე შემოიყვანეს, რადგან საავადმყოფო ახლოსაა ბინებთან, სადაც თავდასხმა მოხდა.
პაციენტები თანდათან შემოჰყავდათ, თავიდან შემოიყვანეს ორი მათგანი, პარალელურად სროლის ხმა არ წყდებოდა და არც შეწყდა მანამ, სანამ სპეცრაზმი არ ჩამოვიდა..რომ შემოიყვანეს პოლიციელი, რომელიც სასიკვდილოდ იყო დაჭრილი, კლინიკასთან ასევე ისმოდა ხმაური. შესაბამისად, ჩვენ თვითონ გავედით გარეთ და დავეხმარეთ პაციენტებს შემოსვლაში”.
ნანა კევლიაშვილი ყვება, რომ დაჭრილებს შორის ძირითადად იყვნენ ახალგაზრდა კაცები. მათ შორის ერთი- სასულიერო პირის შვილი ამჟამად რეანიმაციურ განყოფილებაში იმყოფება და მას არაერთი რთული ოპერაცია ჩაუტარდა. მასთან შედარებით სხვები მეტ-ნაკლებად მსუბუქად იყვნენ დაჭრილები ფეხში, ერთი გოგო კი თვალში იყო დაჭრილი. ეს უკანასკნელი შემდგომ თბილისში გადაიყვანეს.
„ემოციურად ძალიან რთული იყო. მაგრამ მაშინ ემოციებზე არავინ ვფიქრობდით. ერთადერთი ვფიქრობდით, რომ სწრაფად გაგვეკეთებინა ყველაფერი, დრო არ დაგვეხარჯა და დავხმარებოდით პაციენტებს. ძალიან მობილიზებულად, კარგად და გუნდურად გავაკეთეთ ყველაფერი, რათა არცერთი წამი არ დაკარგულიყო.
მაშინვე სწრაფად მოხდა გამოძახებები, ჩამოვიდა ჩვენი დირექტორი, მოვიდა მიმართულების ხელმძღვანელი, ტრავმატოლოგი, მორიგე ქირურგი აქ იყო… ყველაფერი ძალიან სწრაფად დავგეგმეთ. ძალიან გუნდურად ვიმუშავეთ“,- ყვება ექთანი.