მომღერალ აჩიკო მეფარიძის მიერ დაზარალებული ქალი, ლელა ჯუღელი აცხადებს, რომ მეფარიძე მის მოსყიდვას ცდილობდა შუამავლების მეშვეობით, რადგან ჯუღელს სარჩელი გამოეტანა და გამოძიება შეწყვეტილიყო.
ჯუღელის განმარტებით, მეფარიძემ იმდენად მძიმე დანაშაული ჩაიდინა, რომ სარჩელის გამოტანას არ აპირებს.
აჩიკო მეფარიძესა და ლელა ჯუღელს შორის ინციდენტი თბილისში, 2022 წლის აპრილში მოხდა. ინციდენტის შემდეგ მეფარიძე ავტომობილით ქალს დაეწია და სიტყვიერი და ფიზიკური შეურაცხყოფა მიაყენა. ჯუღელის თქმით, ფიზიკური შეურაცხყოფის სურათებიც აქვს.
„მომეპარა არაკაცურად, დამესხა თავს, მუშტი მომიქნია, სილა გამარტყა, მემუქრებოდა – დაგამახინჯებ, არ გაცოცხლებო. ფოტომასალა არსებობს, სადაც მაქვს დალურჯებული სახე და ხუთი თითი მეტყობოდა. მიხსენებდა ვითომ ცნობილ ადამიანებს, რომლებიც ჩემთვის აბსოლუტურად არაფერს არ წარმოადგენენ, ჩემი მოსყიდვა, ჩემი თავმოყვარეობისთვის აბსოლუტურად მიუღებელია“, – განუცხადა ჯუღელმა „TV პირველს“.
აღნიშნულის შესახებ კომენტარი გააკეთა მეფარიძემაც.
„9 თვე გავიდა ხომ იმ ინციდენტის მერე, იმ ინციდენტის დროს, მე თურმე ვემუქრებოდი. ერთ რაღაცას გეტყვით, რომ ეს არის პროვოკაცია, ვერ გეტყვით, რა ამოძრავებს ამ ქალბატონს, არ ვიცი, მიზეზი რა არის, მაგრამ არის პროვოკაცია, რომლის ინიციატორი თვითონ არის“, – აღნიშნა მეფარიძემ.
ცნობისთვის, საქალაქო სასამართლოში, ხვალ, 12 იანვარს, მომხდარზე წინასასამართლო სხდომა ჩაინიშნება.