თერჯოლაში 11 წლის ბავშვის გარდაცვალების ოფიციალურ ვერსიად თვითმკვლელობის დასახელების შემთხვევაში, გარდაცვლილ ბიჭს მართლმადიდებელი ეკლესია წესს არ აუგებს. სასულიერო პირები გამონაკლისის დაშვებას არ აპირებენ და ამის საპასუხოდ ამბობენ, რომ – “ღმერთს გამონაკლისები არ აქვს”.
თავად გარდაცვლილი 11 წლის ბავშვის ბებია კი, საპატრიარქოს უმორჩილესად სთხოვს, დაუშვან გამონაკლისი, რომ ბავშვი წესის აგების გარეშე არ დაიკრძალოს. გარდაცვლილის ბებია იმასაც ამბობს, რომ შესაძლოა მის შვილიშვილს სუიციდი არ ჩაედინა.
“ვთხოვთ საპატრიარქოს, დამეხმაროს და ჩემს პატარას წესის აუგებლად ნუ გაუშვებენ ამ ქვეყნიდან. ბავშვი მორწმუნე იყო, შეიძლება თავი არც მოუკლავს, მაგრამ, თუ ეს მართლა ჩაიდინა, ეს გააკეთა სტრესის გამო და ამიტომ, ვთხოვ მათ დაუშვან გამონაკლისი და აუგონ წესი ბავშვს,”- აცხადებს 11 წლის ბავშვის ბებია როზა ბოგვერაძე.
დღეს, 11 წლის ბავშვისთვის წესის აგების საკითხზე, “რუსთავი 2-თან”, მიტროპოლიტმა გიორგი შალამბერიძემ ისაუბრა და აღნიშნა, რომ გამონაკლისი დაუშვებელია, თუმცა ეპარქიის მამაოებს მომხდარის გარკვევას დაავალებს.