თვითმკვლელობა თუ მკვლელობა – თერჯოლაში გარდაცვლილი 11 წლის ბავშვის ნათესავები მამას მოზარდის მკვლელობაში ადანაშაულებენ. ბავშვის ბებია დარწმუნებულია რომ მორიგი ცემისას მამაკაცმა მოზარდი მოკლა და კვალის დაფარვის მიზნით, ცხედარი ხეზე ჩამოკიდა. ბავშვის თვითმკვლელობამდე მიყვანის ბრალდებით დაკავებულ მამაკაცს ბრალს დღეს ოფიციალურად წაუყენებენ.
“გუშინ ასე მითხრა, ყოველ ღამე აფეთქებული იყო ტელეფონიო, როცა მთვრალი იყოო, ბიძია მიშველე, ბიძია მიშველე, მიძახოდაო. ბიძამისს წაუყვანია სახლში, მამამისს დაუძინია, მერე ბიძამისს უთქვამს წადი, პაპიროსი და “აჩკები” დამრჩა იქო. დედამისს უთხრა, დედა ახლა პაპიროსსა და “აჩკებზე” მივდივარ სახლში და თან მეშინია მამამ არ დამინახოს, თორე მომკლავსო, ბიძამისმა თქვა, მთელი ღამე მამამისი მირეკავდა, გამოუშვი ბავშვი, უნდა მოვკლა მაინც, სულ ერთიაო. მერე დაურეკია ჩემი შვილისთვის ლანძღა, თათხა, ფულს გამომიგზავნი თუ არაო, უთქვამს არ გაღირსებ ფულსო, მაშინ თუ ფულს არ მაღირსებ, ვეღარც ამ შვილის ხმას გაიგონებო,” – აცხადებს ბავშვის ბებია.
მეზობლების განცხადებით მამაკაცი წლების განმავლობაში ხშირად ეჩხუბებოდა მეუღლეს და კონფლიქტების შემდეგ ქალი თავის მშობლებთან მიდიოდა. მათი თქმით, ასე ხდებოდა მაშინაც, როდესაც უფროსი 3 გოგო პატარა იყო, რაც შეეხება უმცროს ვაჟს, როდესაც დედა ემიგრაციაში წავიდა, ის წლის და რამდენიმე თვის იყო. როგორც მეზობლები ამბობენ ბევრჯერ იყო გამოძახებული პოლიციაც.