ახალი წლის ღამეს შეფ-მზარეული გურამ ბაღდოშვილს ხელში პიროტექნიკა აუფეთქდა, რის გამოც თბილისის ერთ-ერთ კლინიკაში გადაიყვანეს. ბაღდოშვილმა მარცხენა ხელი დაიზიანა და მისი მდგომარეობა საკმაოდ რთული იყო. ამ ეტაპზე კი სტაბილურადაა და მკურნალობას კლინიკაში აგრძელებს.
“ახლა არ მსურს ვრცლად ინტერვიუს მიცემა, ერთადერთი რასაც ვიტყვი, პიროტექნიკას ნამდვილად გაუწყრა ერთი ადამიანი, ჩემი სახით და ყველაფერს გავაკეთებ საქართველოში ადრე და მალე აიკრძალოს! ამ სიტყვას გაძლევთ! სინდისს ვფიცავ არ ვიცოდი, სადღაც “ტიკ-ტოკებზე” კი მინახავს, მაგრამ არ მეგონა რომ ამდენის დაშავება შეეძლო, ამდენი პრობლემის გამომწვევი თუ იყო… ნამდვილად არ ვიცოდი ეს ყველაფერი, რადგან ჩემი საქმით ვარ დაკავებული.
დანაშაული დავუშვი და ახლა ვეცდები, რომ ეს დანაშაული გამოვასწორო და მომავალში ნაკლები მსხვერპლი იყოს. ღმერთი არ ვარ, მაგრამ ჩემს ძალებში რაც იქნება, ყველაფერს გავაკეთებ! კანცელარიის წინ დიდი პლაკატებით დავდგები.
არ ვიცოდი, ნამდვილად არ ვიცოდი! ჯერ ერთი იმიტომ, რომ ამ ქვეყანაში არ მიცხოვრია… რაღაც ისე მოხდა, რომ ამ ახალ წელს თითქოს ბავშვი დაიბადა ჩემში და ისეთი შეცდომა დავუშვი, რომელიც სამაგალითო იქნება ჩემთვისაც და ყველასთვის! აუცილებლად დავდებ ძალიან დიდ პლაკატზე ჩემი გახეთქილი ხელის ფოტოს და კანცელარიის წინ გავიტან, რათა პიროტექნიკა აიკრძალოს”, – განაცხადა ბაღდოშვილმა.
რაც შეეხება მის ჯანმრთელობის მდგომარეობას, ბაღდოშვილმა განაცხადა, რომ მხნედაა.
“უკეთესად და მჯერა, რომ ოცდამეერთე საუკუნეში ყველაფერი კარგად იქნება! მე ისეთი ძლიერი ვარ, სულ ცალხელა რომ ვიყო, მაინც გავძლებ. ხალხის სიყვარულს ვგრძნობ და ეს ბევრს ნიშნავს… არასასიამოვნო კომენტარებს ვინც წერს, ვიღაცას ჰგონია, რომ წერა-კითხვა არ ვიცი და ინსტრუქცია არ წამიკითხავს. უხარისხო პროდუქციაა საქართველოში შემოტანილი – სადღაც წლების განმავლობაში სარდაფებში ნაგდები. საერთოდ ინფანტილიზმის ექსპლუატაცია მიმდინარეობს ჩინეთში, ინდოეთში, 10-12 წლის ბავშვები აწყობენ სასიკვდილო იარაღს, საახალწლო სიკვდილს – ასე ვეძახი მე ამას! ძალიან მისახედია ეს საკითხი”, – თქვა შეფ-მზარეულმა.
წყარო: ამბები.GE