ტელეწამყვანმა ინგა გრიგოლიამ რამდენიმე დღის წინ სოციალურ ქსელ “ფეისბუქში” ვრცელი წერილი გამოაქვეყნა, სადაც წერდა, რომ მას უცნობი მამაკაცი 2011 წლიდან ურეკავს, მასზე ფსიქოლოგიურად ძალადობს და ფულს სთხოვს. ტელეწამყვანი აღნიშნავდა, რომ მან პოლიციას რამდენჯერმე მიმართა, თუმცა მაშინ ადევნების შესახებ კანონი მიღებული არ იყო და მისი საკითხი რეაგირების გარეშე დარჩა.
ინგა გრიგოლიას ამ განცხადების შემდეგ, შინაგან საქმეთა სამინისტრომ გამოძიება დაიწყო და პირი, რომელიც ტელეწამყვანს ემუქრებოდა 21 მაისს დააკავა.
“შინაგან საქმეთა სამინისტროს თბილისის პოლიციის დეპარტამენტის უბნის ინსპექტორების სამმართველოს თანამშრომლებმა, ჟურნალისტ ინგა გრიგოლიას მიმართ განხორციელებული მუქარისა და ადევნების ფაქტზე, 1970 წელს დაბადებული რ.ნ. დააკავეს. მის მიერ ჩადენილი დანაშაული 2 წლამდე ვადით თავისუფლების აღკვეთას ითვალისწინებს.
შინაგან საქმეთა სამინისტრომ აღნიშნულ ფაქტზე გამოძიება მიმდინარე წლის 19 მაისს, ინგა გრიგოლიას მიერ სოციალურ ქსელში ინფორმაციის გამოქვეყნების შემდეგ, ამავე ინფორმაციის საფუძველზე დაიწყო.
ოპერატიულად ჩატარდა შესაბამისი საგამოძიებო მოქმედებები, გამოიკითხნენ თავად ინგა გრიგოლია და სხვა მოწმეები. ნივთმტკიცების სახით ამოღებულ იქნა მუქარის შემცველი წერილები და სხვა სახის შეტყობინებები.
გამოძიებამ დაადგინა, რომ რ.ნ. ხანგრძლივი პერიოდის განმავლობაში ინგა გრიგოლიას ტელეფონით, ელექტრონული და სხვა საშუალებებით მუქარის შემცველ შეტყობინებებს უგზავნიდა.
გამოძიება მუქარისა და ადევნების ფაქტებზე, საქართველოს სსკ-ს 151-ე მუხლის 1-ლი ნაწილით და 151-ე პრიმა მუხლის 1-ლი ნაწილით მიმდინარეობს”, – ნათქვამია შსს-ს განცხადებაში.
ინგა გრიგოლიამ “ფეისბუკში” იმ მამაკაცის ფოტო გაავრცელა, ვინც ემუქრებოდა.
“აი,მეგობრებო, ეს არის იმ კაცის ფოტო, რომელიც მემუქრებოდა და მაშანტაჟებდა, რომელიც ამდენი წელი მაცხოვრებდა საშინელ სტრესში, მისი ფოტო “რეაქციის” ანონსშია, იხილეთ და ვეჭვობ, ამ ფოტოს რომ ნახავთ, მიხვდებით რა უცნაური ამბავი მჭირს”, – წერს ინგა გრიგოლია სოციალურ ქსელში.