“ნიკოლოზი, ჩემი ერთადერთი შვილია, რომელსაც 5 წელი ველოდი. დილით რომ შემომხედავს და გამიცინებს, ეს ჩემთვის ყველაფერია…“ – ამბობს ნიკოს დედა ეკატერინე ჩაჩიბაია.
მუკოვისციდოზი – ყველაზე ფართოდ გავრცელებული გენეტიკური დაავადებაა, რომელიც ყველაზე მეტად აზიანებს ფილტვებს, ასევე თირკმელებს, პანკრეასს, ღვიძლსა და ნაწლავებს. დედამიწაზე ყოველი მე -20 ადამიანი, ამ დეფექტური გენის მატარებელია.
საქართველოში, ამ დაავადებას, 14 წლის ნიკოლოზი, 14 წელია ებრძვის. ოჯახს, რომელიც დღემდე ღმერთის და კეთილი ადამიანების გვერდში დგომით არიან, დახმარება სჭირდება.
მუკოვისციდოზით დაავადებულ ადამიანს მთელი სიცოცხლის მანძილზე სჭირდება სხვადასხვა მედიკამენტი – მუკოლიზური საშუალებები, ფერმენტული პრეპარატები, ანტიბიოტიკები და ჰეპატოპროტექტორები.
პრეპარატების შესაყვანად, აუცილებელია ინჰალატორები. დიდი მნიშვნელობა აქვს კვებას. სასიცოცხლო მნიშვნელობისაა კინეზითერაპია, სუნთქვითი ვარჯიშები და სპეციალური ტანვარჯიში, რომელიც ხელს შეუწყობს ნახველის გამოდევნას.
ვარჯიში ყოველდღიური უნდა იყოს და მთელი სიცოცხლის მანძილზე საარსებო წესად დანერგილი. მუკოვისციდოზის მძიმე გამწვავების დროს, საჭიროა, ჟანგბადის კონცენტრატი.
ნიკოს დედა, ეკატერინე ჩაჩიბაია „პრაიმტაიმთან“ ინტერვიუში აცხადებს, რომ ნიკოლოზი, ამიერკავკასიის მასშტაბით, ერთადერთი ადამიანია, რომელიც სუნთქვით აპარატზეა ჩართული:
ექიმი არ ვარ პროფესიით, მაგრამ ჩემი შვილის პრობლემების გამო, იძულებული გავხდი ამეთვისებინა. ნიკოლოზი, ჩემი ერთადერთი შვილია, რომელსაც 5 წელი ველოდი – დილით რომ გაიღვიძებს, შემომხედავს და გამიღიმებს, ეს ჩემთვის ყველაფერია.
ნიკოლოზი 14 წლისაა და 14 წელია მართვით სუნთქვაზეა. 1,8 თვე ვიწექით იაშვილის კლინიკაში და დაუდგინდა დიაგნოზი – მუკოვისციდოზი, კისტური ფიბროზი – შერეული ფორმით. 17 ივლისს 14 წლის გახდა და 2008 წლის 17 ივლისიდან მართვით სუნთქვაზეა.