ბაჩანა ლობჟანიძე, რომელიც ამტკიცებს, რომ თამარ ბაჩალიაშვილის შეყვარებული იყო, 23 წლის ახალგაზრდა ქალთან ბოლო შეხვედრას იხსენებს. მისი განცხადებით, გოგონას 19 ივნისს, ლისზე ყოფნის დროს სიკვდილზე ესაუბრა. ამის შესახებ მან “მთავარი არხის” ეთერში, ნიკა გვარამიას გადაცემაში განაცხადა.
ბაჩანა ლობჟანიძემ თამარ ბაჩალიაშვილს სიკვდილი ასე განუმარტა:
„სიკვდილი არის ყველაზე დიდი ილუზია, სანამ დადგება, ის არსებობს ჩვენში და რომ დადგება, ის უკვე აღარ არსებობს. ანუ მეორედ ვეღარ მოვკვდებით, გარდამავალი წერტილია.
ადამიანი არის დინებაში და როცა ამ დინებაში ადამიანი გარდაიცვლება, ეს ყველაზე დიდი საშინელება არის-მეთქი, – ეს ვუთხარი. თუ ადამიანი გარდაიცვლება უცოდნელობაში, ანუ ცოდნაში ნაკლებობით, ეს მისთვის ყველაზე დიდი საშინელებაა და ამას უკვე სიკვდილზე საუბარი მოჰყვა”- თქვა ლობჟანიძემ.
კითხვაზე, რატომ ელაპარაკა გოგონას საკუთარ დაბადების დღეზე სიკვდილზე, ბაჩანა ლობჟანიძე ასე პასუხობს:
“ჩვენ ბევრ თემაზე ვსაუბრობდით ხოლმე, ერთ-ერთი იყო ეს…”
გარდა ამისა, ბაჩანა ყვება, რომ თამარმა სტუდენტობის პერიოდში სამჯერ სცადა სუიციდი. მისივე თქმით, ეს ინფორმაცია მას თამარის მეგობარმა დეა კაპანაძემ უთხრა.
ბაჩანა ამბობს, რომ თამარი სტუდენტობისას გაიცნო. ყვება იმასაც, რომ თამარზე ჰქონდა ზეგავლენა და ის მის აზრსაც ითვალსიწინებდა. ლობჟანიძე იხსენებს კონკრეტული სელფის ისტორიასაც როცა მას არ მოეწონა როცა თამარმა ვულგარული ფოტო ატვირთა და ის მისი თხოვნით აიღო რაზეც მასთან საუბარიც ჰქონდა.
ცნობისთვის, ბაჩანა ლობჟანიძე, რომელიც თამარ ბაჩალიაშვილის საქმეში გარდაცვლილის “შეყვარებულს” სახელით გამოჩნდა, აცხადებს, რომ ახალგაზრდა პროგრამისტის გარდაცვალება მის სამსახურს უკავშირდება. მისი თქმით, კომპანია “ზეგ” მალავს რეალურ საქმიანობას.
შეგახსენებთ, თამარ ბაჩალიაშვილი 18 ივლისს გაუჩინარდა. ახალგაზრდა პროგრამისტი სათვალთვალო კამერებმა ბოლოს თეთრიწყაროს რაიონში დააფიქსირეს. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს.
ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.