ბოლო რამდენიმე დღეა იტალიურ პრესაში აქტიურად საუბრობენ იმის შესახებ, რომ იტალიაში, 2023 წლის იანვრიდან, შესაძლოა, “ბადანტეების” და შინამოსამსახურეების ხელფასი გაიზარდოს. სახელმწიფო, აღნიშნული ცვლილების განსახორციელებლად, საკანონმდებლო ცვლილების გატარებას გეგმავს. ამაზე და ასევე “შავი სამუშაო ბაზრის” მართვის აუცილებლობაზე, ისაუბრა სახელმწიფო მდივნის მოადგილემ შრომის სამინისტროში, კლაუდიო დურიგონიმაც.
თუ ხელფასების მომატებასთან დაკავშირებული საკანონმდებლო ცვლილება განხორციელდა, ოჯახებში დასაქმებულ პირებს ყოველთვიურად დაახლოებით 125-ევროიანი დანამატი ექნებათ ხელფასზე (მომვლელის სრულგანაკვეთიანი სამუშაო კონტრაქტის შემთხვევაში). ერთი შეხედვით, სიახლე საკმაოდ მომხიბვლელი ჩანს ოჯახებში დასაქმებული პირებისთვის, მაგრამ აღნიშნული ცვლილების განხორციელების შემდეგ, თუ გავითვალისწინებთ სახელფასო, საშვებულებო, ე.წ. “ლიკვიდაციონეს” და TFR-ს, ოჯახებს საკმაოდ მძიმე ტვირთი დააწვებათ, რადგან წელიწადში დაახლოებით 2000 ევროთი მეტის გადახდა მოუწევთ. Assindatcolf-ის პრეზიდენტის ანდრეა ძინის განცხადებით, ამან შესაძლოა ოჯახები აიძულოს მომვლელებზე უარი თქვან, ან სამუშაო საათები შეამცირონ.
კლაუდიო დურიგონის განცხადებით, ცვლილების ცალსახად განხორციელება არ შეიძლება და სახელმწიფომ აუცილებლად უნდა იზრუნოს დამსაქმებელი ოჯახების ფინანსურ მდგომარეობაზეც, რისთვისაც შესაძლოა სპეციალური ფონდი გამოიყოს. საკითხი წლის ბოლომდე უნდა გადაწყდეს.