ქანიე უესტმა საჯაროდ განაცხადა, რომ ბოლოდროინდელი სკანდალის მიუხედავად, Balenciaga-ს მხარს უჭერს. ბრენდს, ორი სარეკლამო კამპანიის გამო, რომლებიც 16 და 21 ნოემბერს გამოვიდა, პედოფილიასა და ბავშვთა პორნოგრაფიის გავრცელებაში ადანაშაულებენ. მას შემდეგ, რაც ქანიემ ბრენდსა და დემნა გვასალიაზე მოუთოკავი პოსტების გამოქვეყნება დაიწყო, Twitter-მა კიდევ ერთხელ დაბლოკა მისი ანგარიში.
“მე Balenciaga-ს გვერდში ვიდგები! წინააღმდეგი ვარ ადამიანებზე ნადირობის. გაუქმების კულტურას მე შევწყვეტ. იესო მეფეა. ტრეფიკინგი არ იწყება და არ მთავრდება მოდის კამპანიით, ღვთის გულისათვის“, – წერდა რეპერი. (“გაუქმების კულტურა” (Cancel Culture) – ოსტრაკიზმის თანამედროვე ფორმა, რა დროსაც ვინმეს რიყავენ საზოგადოებრივი ან პროფესიული წრეებიდან). “ბალნსიაგას” გაუქმების სანაცვლოდ, მან “ტვიტერიდან” და სხვა პლატფორმებიდან ყველა სახის პორნოგრაფიული მასალის წაშლა ითხოვა.
მომდევნო პოსტში უესტი წერს: “ზურგს არასდროს ვაქცევთ. დემნა და Balenciaga-ს ოჯახი ცხოვრების ბოლომდე! შეწყდეს გაუქმების კულტურა”.
მანამდე, რეპერმა მისი და “ბალენსიაგას” კრეატიული დირექტორის, დემნა გვასალიას მიმოწერა გაავრცელა “ტვიტერზე”.
წერილებში დემნა უესტს ევედრება, რომ თავის ფანებს სთხოვოს, “შეწყვიტონ დემნას მიმართ სიძულვილი“, რომელზეც ვესტმა უპასუხა: “სიყვარული ყველაფრის წამალია, გიყვარდეთ დემნა“.
რეპერის გამოქვეყნებული უამრავი პოსტიდან კიდევ ერთში, ის განაგრძობს ბრენდის დაცვას:
“ღმერთს უყვარს Balenciaga. სიყვარული ყველაფრის პასუხია, იესო ყველაფრის პასუხია. ვლოცულობ ყველა უდანაშაულო ხელოვანისა და ლამაზი ადამიანისთვის, რომლებიც მხოლოდ ტანსაცმელს ქმნიან..“
შემდეგ უესტმა ლოგო გააზიარა, რომელიც დავითის ვარსკვლავისა და სვასტიკის გაერთიანებულ ვერსიას წააგავდა, მაგრამ ტვიტი მალევე წაიშალა, რაგან ის საიტის რეგულაციებს არღვევდა. „მე ყველაფერი ვცადე. ამის მიუხედავად, ჩვენი წესები ძალადობის წაქეზების შესახებ მან ისევ დაარღვია. მისი ანგარიში გაუქმდება“,- დაწერა ილონ მასკმა.