საქართველოს ეტლით მოფარიკავე ქალთა ნაკრები ევროპის ჩემპიონია – ინფორმაციას საქართველოს პარაოლიმპიური კომიტეტი ავრცელებს.
“დღეს ეტლით ფარიკაობაში, პოლონეთში მიმდინარე ევროპის ჩემპიონატზე გუნდურ შეჯიბრში, ხმლით ფარიკაობაში, ჩვენმა ნაკრებმა შემდეგი შემადგენლობით -ირმა ხეცურიანი, ნინა თიბილაშვილი, გვანცა ზადიშვილი, ფინალურ ბრძოლაში უკრაინის ნაკრებს მოუგო ანგარიშით 45:42, პირველ ადგილზე გავიდა და ოქროს მედლის მფლობელი გახდა.
ვულოცავთ საქართველოს ნაკრებს, მწვრთნელებს მალხაზ მესხს, მერაბ ბაზაძეს ამ გამარჯვებას.
ქართველი პარა მოფარიკავეები განაგრძობენ ასპარეზობას პოლონეთში მიმდინარე ევროპის ჩემპიონატზე. წარმატებებს და კვლავ მაღალი სინჯის მედლების მოპოვებას ვუსურვებთ” – ნათქვამია ინფორმაციაში.

