ორგანიზაცია “დემოკრატიის მცველების“ ხელმძღვანელი, გიორგი მშვენიერაძე, “იმედის” ჟურნალისტის, მარიკა ბაკურაძის, გარშემო განვითარებულ მოვლენებს ეხმაურება და სოციალურ ქსელში წერს:
“ღრმად ვარ დარწმუნებული ტვ იმედის ჟურნალისტს ფბ კომენტარების ავტორების იდენტიფიცირებაში სუსი რომ დაეხმარა, და თან ისე, რომ შეიძლება ამის შესახებ ჟურნალისტმა თავადაც არ იცოდეს. მაგრამ მიუხედავად ჩემი ამ მოსაზრებისა, კატეგორიულად მიუღებელია ამ საკითხს პერსონალურ მონაცემთა ინსპექტორი სწავლობდეს. ეს სამართლებრივადაც არასწორია და რაციონალურადაც.
თავად სიუჟეტის მთავარ გზავნილზე – დიდი ძმა ყველას გხედავთ და ყველგან მოგაგნებთ – ბევრი ითქვა და აღარაფერს დავამატებ“, – წერს გიორგი მშვენიერაძე.
ცნობისთვის, “იმედის“ ერთ-ერთმა ჟურნალისტმა მისი სიუჟეტის ქვეშ გაკეთებული უარყოფითი კომენტარის ავტორებს გადაურეკა და მათ განმარტება მოსთხოვა. საკითხის შესწავლა პერსონალურ მონაცემთა დაცვის სამსახურმა დაიწყო.