მარიტა მეფარიშვილის გარდაცვალებიდან 40 დღე გავიდა. ამასთან დაკავშირებით მამა შალვა კეკელიამ იქადაგა. მისი თქმით, როცა მარიტას მეგობარმა უთხრა, ფანტანის ავზში არ შეხვიდეო, მარიტამ უპასუხა, სხვანაირად არ შემიძლიაო. ეს იყო მარიტას უკანასკნელი სიტყვები.
„ყოველ დღე ვევედრები უფალს, რომ ყველას გაგვააზრებინოს, პატარა გოგომ რა გააკეთა. დიდებიც კი ვერ შევიდნენ, ვერ გაბედეს წყალში შესვლა. ეს პატარა გოგონა შევიდა მეგობრის გადასარჩენად. როცა მეგობარმა უთხრა, არ შეხვიდეო, მარიტამ უპასუხა, სხვანაირად არ შემიძლიაო.
ქრისტიანობისთვის ყველაფერი გააკეთა ამ პატარა გოგონამ… ქრისტეს არ ეკუთვნოდა ჯვარცმა, სიკვდილი, მაგრამ ჩვენ გამო გაეკრა ჯვარზე. მარიტა წყალში არ უნდა ყოფილიყო, იქ შევიდა იმისთვის, რომ ლაზარე გადაერჩინა.
დღეს ლაზარე ღვთისმსახურია. ამ მაგალითზე უნდა იზრდებოდნენ ადამიანები… მე მინდა მის საოცარ მშობლებს, ანას და დავითს მადლობა გადავუხადო, რომ ასეთი შვილი გაუზარდეს ქვეყანა.
ეს მშობლები არიან სამაგალითო ყველაფრით, ზრდილობით, პროფესიონალიზმით, წესიერებით, საოცარი სანათესავო ჰყავს მარიტას… ქართველობა არის მარიტა, ქართველობა არის მარიტას ოჯახი…“ – თქვა მამა შალვამ.
შეგახსენებთ, 13 წლის მარიტა მეფარიშვილის სიცოცხლე ვაკის პარკში მომხდარ ტრაგიკულ შემთხვევას შეეწირა. ის ვაკის პარკის ფანტანის ავზში მეგობრების დასახმარებლად შევიდა. აღნიშნულ საქმეზე 9 პირია დაკავებული.