შსს-ს რამდენიმე თანამშრომელს კორონავირუსი დაუფიქსირდა, თუმცა საგანგაშო არაფერია, – ამის შესახებ ჯანდაცვის მინისტრმა საკოორდინაციო საბჭოს დასრულების შემდეგ განაცხადა. ეკატერინე ტიკარაძის თქმით, ასევე დაინფიცირებულია 20-მდე ექიმი.
„არიან ექიმები, ვისაც დაუფიქსირდათ. მათი რიცხი დღეის მონაცემებით არის 20-მდე. ეს გარკვეულწილად იყო მოსალოდნელი. აქედან გამომდინარე, დაიგეგმა ეს გაიდლაინი და ალგორითმი, რის მიხედვითაც ხდება ამ ჯგუფების ტესტირება. ზოგადად სიტუაცია ამ ჯგუფებში არის კონტროლირებადი. ჩვენ დამატებით კიდევ ვმუშაობთ იმ უსაფრთხოების ზომების და ნორმების დანერგვაში. ასევე მიმდინარეობს გარკვეულწილად ტრენინგები ყველა ამ ჯგუფში, რათა ისინი სამომავლოდ იყვნენ უფრო მეტად დაცულები. აქ აღსანიშნავია ის ფაქტი, რომ დაავადება მათ ძირათადად უსიმპტომოდ აქვთ გადატანილი. პრევენციიდან გამომდინარე, ყველა ის ექიმი, ვინც დაინფიცირდა, დღეს იმყოფება დაკვირვების ქვეშ, რათა დარწმუნებული ვიყოთ, რომ მათგან სხვა ადამიანები არ დაინფიცირდებიან“, – განაცხადა ტიკარაძემ.
საქართველოში კორონავირუსი 420 ადამიანს დაუდასტურდა, აქედან 107 უკვე გამოჯანმრთელდა, 5 კი გარდაიცვალა. საქართველოს კიდევ 3 მოქალაქეს კორონავირუსი სხვა ქვეყნებში დაუდასტურდა და ისინი საქართველოში გადმოიყვანეს.
ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.