კორონავირუსის პანდემიამ პიკს ჯერ არ მიაღწია. ამის შესახებ Reuters-ი ჯანდაცვის მსოფლიო ორგანიზაციის ოფიციალურ წარმომადგენელ მარგარეტ ჰარისზე დაყრდნობით წერს.
ჰარისის თქმით, ევროპაში ინფიცირების არაერთგვაროვანი სურათია: იტალიასა და ესპანეთში ვითარება გაუმჯობესდა, დიდი ბრიტანეთსა და თურქეთში კი ინფიცირებულთა რაოდენობის ზრდა ფიქსირდება.
მისივე თმით, COVID 19-ის შემთხვევათა 90% ევროპასა და აშშ-ზე მოდის, ჩინეთში კი კვლავ ფიქსირდება შემოტანილი შემთხვევები, ძირითადად რუსეთიდან.
ჰარისის თქმით, კორონავირუსის საწინააღმდეგო ვაქცინა სულ ცოტა 1 წლის შემდეგ იქნება მზად.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.