17 ნოემბერს ოკუპირებული ცხინვალის რეგიონის დე ფაქტო საგარეო საქმეთა სამინისტრომ კაია კალასის განცხადებას სპეციალური კომენტარით უპასუხა.
დე ფაქტო უწყებამ კალასის განცხადება „აბსოლუტურად შეუსაბამოდ“ შეაფასა და განაცხადა, რომ ევროკავშირი ცდილობს, სირიის მიერ რეგიონის ე.წ. დამოუკიდებლობის აღიარების საკითხი ასოცირების შეთანხმების პირობებს დაუკავშიროს.
განცხადებაში ნათქვამია, რომ ცხინვალის რეგიონი „სუვერენული და დამოუკიდებელი სახელმწიფოა“, ხოლო სირიის მიერ მისი აღიარება, დე ფაქტო უწყების მტკიცებით, საერთაშორისო სამართლის ნორმების დაცვით მოხდა.
დე ფაქტო უწყება ასევე მიუღებლად მიიჩნევს კალასის მიერ ტერმინის „საქართველოს ოკუპირებული ტერიტორიები“ გამოყენებას და აცხადებს, რომ ევროკავშირის ამგვარი პოზიცია კონსტრუქციულ დიალოგს ხელს უშლის.
„მიუღებელია მცდელობა, სამხრეთ ოსეთის აღიარების საკითხი ევროკავშირის მესამე ქვეყანასთან შეთანხმების პირობებს დაუკავშირონ, ისევე როგორც ჩვენი ქვეყნის მიმართ ტერმინის „საქართველოს ოკუპირებული ტერიტორიები“ გამოყენება“, – ნათქვამია განცხადებაში.
განცხადების ბოლოს დე ფაქტო უწყება ევროკავშირს „პოლიტიკური შანტაჟის“ შეწყვეტისკენ მოუწოდებს და ამტკიცებს, რომ საქართველოს წინააღმდეგობის მიუხედავად, სირიასთან ურთიერთობების გაღრმავებას გააგრძელებს.
