უკრაინის უსაფრთხოების სამსახურის (SBU) ცნობით, უკრაინამ 11 ნოემბერს ფინეთის ყურეში რუსულ სამხედრო ხომალდს “ნარო-ფომინსკს” დაარტყა. ხომალდზე იერიშის ფაქტი ფინელმა მაღალჩინოსნებმაც დაადასტურეს.
SBU-ს ინფორმაციით, დარტყმა იმავე ოპერაციის ნაწილი იყო, რომლის ფარგლებშიც უკრაინამ ბალტიის ზღვის სანაპიროზე, უსტ-ლუგის ნავთობის საექსპორტო ტერმინალსაც შეუტია.
ამასთან, ესტონეთის თავდაცვის მინისტრმა მარტინ ჰერემმა საზოგადოებრივ მაუწყებელ ERR-ს უთხრა, რომ ხომალდს ადგილობრივი დროით დაახლოებით 05:30 საათზე დაარტყეს. მისი თქმით, დარტყმის შემდეგ ხომალდიდან კვამლი ამოდიოდა და ის სანქტ-პეტერბურგის მიმართულებით გაბრუნდა.
ფინეთის საგარეო საქმეთა მინისტრის, ელინა ვალტონენის თქმით, ბალტიის ზღვაში ვითარება სტაბილურია და სამოქალაქო ნაოსნობას საფრთხე არ ემუქრება. თუმცა, BBC წერს, რომ ეს შესაძლოა, პირველი შემთხვევა იყოს, როცა უკრაინული დრონები რუსულ გემს ბალტიის ზღვის იმ ნაწილში დაესხნენ თავს, სადაც სამოქალაქო გემებიც მოძრაობენ.