საზოგადოებრივი მაუწყებლის სამეურვეო საბჭოს თავმჯდომარის, ვასილ მაღლაფერიძის ინიციატივით, საბჭოს წევრები დამატებით 1 თვის ჰონორარებს აიღებენ. 2026 წლის ბიუჯეტიდან დარჩენილი თანხის განაწილებაზე ინიციატივა მაღლაფერიძემ 12 ნოემბრის სხდომაზე დააყენა. ინფორმაცია თავდაპირველად მაყურებელმა გაავრცელა.
მაღლაფერიძის ინიციატივით, სამეურვეო საბჭოს ნაშთიდან 207 000 ლარი აჭარის ტელევიზიას გადაეცა “თანამშრომლების წახალისების კუთხით”, ხოლო 200 000 ლარი – საქართველოს პირველ არხს.
საბჭოს თავმჯდომარის ინიციატივითვე, “ბორდის” წევრები დამატებით ერთი თვის ჰონორარებს აიღებენ. განისაზღვრა, რომ:
საბჭოს თავმჯდომარის (ვასილ მაღლაფერიძე) ჰონორარი იქნება 10 898 ლარი (დარიცხული);
სამეურვეო საბჭოს თავმჯდომარის მოადგილის (დავით ქართველიშვილი) – 8 403 (დარიცხული);
მეურვის – 7 521 ლარი (დარიცხული).
ასევე ნოემბერში ერთი თვის ოდენობის შესაბამისი ანაზღაურება დამატებით გაიცემა სამეურვეო საბჭოს აპარატის თანამშრომლებზეც – აპარატის უფროსსა და უფროს სპეციალისტზე.
ვასილ მაღლაფერიძის ინიციატივებს არ დაეთანხმა მხოლოდ ორი წევრი – ლაშა ტუღუში და ლიკა ბასილაია-შავგულიძე. ტუღუშმა საბჭოს თავმჯდომარეს შესთავაზა, “ეს საკითხი გაიტანოთ და შემოიტანოთ ისე, როგორც არის კანონმდებლობის მოთხოვნა და თუ თქვენ მაინც გადაწყვეტთ ამ საკითხის დაყენებას, მე აქვე ვამბობ, რომ არათუ წინააღმდეგ მივცემ ხმას, საერთოდ ვემიჯნები ამ კენჭისყრას. მიმაჩნია, რომ ეს არის კანონის უხეში დარღვევა”.
ვასილ მაღლაფერიძის შეფასებით კი, “ეს არ არის კანონის დარღვევა, ეს არის ჩვეულებრივი პრაქტიკა, რომლითაც ვმოქმედებთ, ამ ტიპის საკითხები არაერთგზის გასულა“.
ლაშა ტუღუშმა და ლიკა-ბასილაია შავგულიძემ სხდომა დატოვეს
გასულ წელს ასევე ვასილ მაღლაფერიძის ინიციატივით, საზმაუს საბჭოს წევრებმა ჰონორარის სახით “მე-13 ხელფასი” მიიღეს. მაშინ გადაწყვეტილებას მხარი არ დაუჭირეს: ზაზა აბაშიძემ, ლაშა ტუღუშმა და ლიკა ბასილაია-შავგულიძემ.