საფრანგეთში მამაკაცმა კათოლიკური ბაზილიკიდან წმინდა ნიკოლოზ საკვირველმოქმედის წმინდა ნაწილების ფრაგმენტი მოიპარა, შემდეგ კი დაწვა და გაანადგურა. ეჭვმიტანილი დააკავეს. მან თავისი საქციელი იმით ახსნა, რომ სურდა „ფეტიშიზმთან ბრძოლა“. ინფორმაციას ფრანგული გამოცემა Tribune Chrétienne ავრცელებს.
შემთხვევა მერისა და მოზელის დეპარტამენტში, სენ-ნიკოლა-დე-პორტის ბაზილიკაში მოხდა. ჟურნალისტების ცნობით, მამაკაცმა დამცავი მინა ჩაამსხვრია, წმინდანის ძვლის ფრაგმენტის შემცველი რელიკვარიუმი მოიპარა, მოგვიანებით კი სიწმინდე გაანადგურა.
ნივთის გაუჩინარება ტაძრის წინამძღვარმა აღმოაჩინა, რომელმაც პოლიციას 2 ნოემბერს მიმართა. სამართალდამცველებმა სათვალთვალო კამერების ჩანაწერების დახმარებით ეჭვმიტანილის ვინაობა დაადგინეს. დაკავების შემდეგ მამაკაცმა, გავრცელებული ინფორმაციით, დანაშაული აღიარა.
დაკითხვისას მან განაცხადა, რომ „ფეტიშიზმთან ბრძოლა“ სურდა. მისი შეხედულებით, წმინდანთა წმინდა ნაწილების თაყვანისცემა ცრურწმენაა.
განადგურებული რელიკვია დაახლოებით ერთიდან ორ სანტიმეტრამდე სიგრძის ძვლის პატარა ფრაგმენტს წარმოადგენდა. ის მინის კაფსულაში, ბაზილიკის მთავარი სიწმინდეებისგან განცალკევებით ინახებოდა.
ბაზილიკის დაცვის ასოციაციის თავმჯდომარემ, დენი ბურკენმა, მომხდარს ვანდალური აქტი უწოდა. ამასთან, მან მორწმუნეები დაამშვიდა და განმარტა, რომ წმინდა ნიკოლოზის ძირითადი წმინდა ნაწილები არ დაზიანებულა და კვლავ ტაძრის საგანძურში ინახება.
Tribune Chrétienne-ის ცნობით, 2026 წლის დასაწყისიდან ბაზილიკაში სიწმინდის ქურდობის ან ვანდალიზმის უკვე მესამე შემთხვევა დაფიქსირდა.
მრევლის წარმომადგენლებმა მომხდარის გამო ღრმა მწუხარება გამოთქვეს და აღნიშნეს, რომ ეს თავდასხმა არა მხოლოდ ისტორიულ მემკვიდრეობას, არამედ მომლოცველთა რამდენიმე თაობის რელიგიურ გრძნობებსაც შეეხო.