სურსათის ეროვნული სააგენტოს ინფორმაციით, სამეგრელო-ზემო სვანეთის დეპარტამენტის ინსპექტორებმა სახელმწიფო კონტროლის ფარგლებში სენაკში რამდენიმე ობიექტი შეამოწმეს. გამოვლენილი დარღვევების გამო ბიზნესოპერატორები დაჯარიმდნენ და საწარმოო პროცესი შეუჩერდათ. უწყება ბიზნესოპერატორებს კანონმდებლობით განსაზღვრული მოთხოვნების დაცვისკენ მოუწოდებს.
“სურსათის ეროვნული სააგენტოს სამეგრელო-ზემო სვანეთის დეპარტამენტის ინსპექტორებმა სახელმწიფო კონტროლის ფარგლებში სენაკში სხვადასხვა პროფილის ობიექტები შეამოწმეს. გამოვლენილი დარღვევების გამო კანონმდებლობით გათვალისწინებული ღონისძიებები გატარდა.
შპს ცენტრალური ბაზრის ობიქეტზე (მისამართი: სენაკი, რუსთაველის ქ. N180) ალკოჰოლიანი და სპირტიანი სასმელის შესაბამისობის სერთიფიკატის გარეშე რეალიზაციის და ეტიკეტირების წესის დარღვევის ფაქტები დაფიქსირდა.
ეტიკეტირების წესი დარღვეული იყო ინდივიდუალური მეწარმე დ. ნ.-ის (მისამართი: სენაკი, ჯორჯაძის N6) სასადილოშიც. ბიზნესოპერატორი არ იყო რეგისტრირებული ეკონომიკურ საქმიანობათა რეესტრში. ამავდროულად, ობიექტზე დაფიქსირდა კრიტიკული შეუსაბამობებიც, მათ შორის, ჰიგიენური ნორმების უხეში დარღვევა.
ფიზიკური პირი თ. ა. (მისამართი: სენაკი. სენაკის ქ. N15) რძეს და რძის პროდუქტებს ეკონომიკურ საქმიანობათა რეესტრში რეგისტრაციისა და სავალდებულო აღიარების გარეშე აწარმოებდა.
გამოვლენილი შეუსაბამობების გამო, ბიზნესოპრატორები, კანონმდებლობის შესაბამისად, დაჯარიმდნენ და საწარმოო პროცესი შეუჩერდათ შეუსაბამობების გამოსწორებამდე.
სურსათის ეროვნული სააგენტო მოუწოდებს ბიზნესოპერატორებს, დაიცვან სურსათის უვნებლობის კანონმდებლობით განსაზღვრული მოთხოვნები”, — წერია სეს-ის განცხადებაში.