რუსეთის უშიშროების საბჭოს მდივანმა სერგეი შოიგუმ 9 ნოემბერს განაცხადა, რომ მოსკოვი საქართველოსთან სავაჭრო-ეკონომიკური თანამშრომლობის განვითარებას მიესალმება.
“მივესალმებით საქართველოსა და რუსეთს შორის სავაჭრო-ეკონომიკური თანამშრომლობის აქტიურ განვითარებას.” – თქვა შოიგუმ დსთ-ს წევრი ქვეყნების უშიშროების საბჭოების მდივნების ყოველწლიურ შეხვედრაზე.
ამასთანავე, შოიგუმ განაცხადა, რომ რეგიონული საკითხები რეგიონის გარეთ მყოფი ქვეყნების ჩარევის გარეშე უნდა მოგვარდეს და ამ კონტექსტში მან “3+3” ფორმატის მუშაობის განახლების მნიშვნელობასაც გაუსვა ხაზი.
“ხაზს ვუსვამ, რომ რეგიონული პრობლემები პოლიტიკური და დიპლომატიური გზებით, რეგიონის გარეთ მყოფი ქვეყნების ჩარევის გარეშე უნდა მოგვარდეს.” – დაამატა რუსეთის უშიშროების საბჭოს მდივანმა.
ცნობისთვის, 3+3 ექვსმხრივი პლატფორმაა, რომელიც ორი “სამეულის” შეხვედრას გულისხმობს. მასში, ერთი მხრივ, აზერბაიჯანი, სომხეთი, საქართველო, ხოლო, მეორე მხრივ, რუსეთი, ირანი და თურქეთი მოიაზრებიან. ინიციატივის ფარგლებში პირველი შეხვედრა 2021 წლის დეკემბერში გაიმართა. საქართველოს ამ ფორმატის შეხვედრებში მონაწილეობა არ მიუღია.